Prezidentam Słavienii abrali advakata Natašu Pirc-Musar. Jana abaraniała Miełaniju Tramp
Niezaležny kandydat, advakat Nataša Pirc-Musar stanie pieršaj žančynaj-prezidentam Słavienii, jana nabiraje kala 54 pracentaŭ hałasoŭ. Pirc-Musar u 2016 hodzie była advakatam Miełanii Tramp, piša Deutsche Welle.
U druhim tury prezidenckich vybaraŭ u Słavienii, jaki prajšoŭ u niadzielu, pieramahaje biespartyjny kandydat, advakat Nataša Pirc-Musar, jakaja prytrymlivajecca levacentrysckich pohladaŭ. Paśla apracoŭki 99,99 pracentaŭ biuleteniaŭ jana nabiraje 53,86 pracentaŭ hałasoŭ, jaje supiernik, były kiraŭnik MZS, deputat ad pravacentrysckaj Słavienskaj demakratyčnaj partyi Anže Łohar — 46,14 pracenta.
Tym samym 54-hadovaja Pirc-Musar stanie pieršaj žančynaj-prezidentam Słavienii. U 2004-2014 hadach jana zajmała pasadu ambudsmiena pa pytańniach svabody ŚMI. U jakaści advakata jana zajmałasia pytańniami abarony pryvatnaha žyćcia i svabodnaha dostupu da infarmacyi.
Samaj viadomaj jaje klijentkaj była žonka Donalda Trampa Miełanija, jakaja ŭ 2016 hodzie viała sudovuju spravu suprać słavienskaha tabłoida, a taksama słavienskich i charvackich kampanij, jakija vykarystoŭvali jaje imia ŭ rekłamnych metach bieź jaje dazvołu. Sud zaviaršyŭsia pieramohaj Tramp.
Jaŭka na vybary ŭ druhim tury skłała 44,08 pracenta z amal 1,7 miljona vybarščykaŭ.
U pieršym tury nivodny z kandydataŭ nie nabraŭ bolš za 50 pracentaŭ. Pa vynikach pieršaha tura 23 kastryčnika, kandydat pravaj apazicyi Łohar atrymaŭ kala 34 pracentaŭ, Pirc-Musar — amal 27 pracentaŭ. Treciaje miesca zaniaŭ deputat Jeŭraparłamienta, kandydat ad partyi «Sacyjalnyja demakraty» i ruchu «Svaboda» Miłan Brhlez, jaki nabraŭ 15,4 pracenta hałasoŭ. U vybarach udzielničali siem kandydataŭ.
Novy kiraŭnik dziaržavy pavinien ustupić na pasadu 23 śniežnia, kali skončycca piacihadovy mandat ciapierašniaha prezidenta Słavienii Boruta Pachara. Słavienija — parłamienckaja respublika, prezident krainy vykonvaje chutčej pradstaŭničyja funkcyi.