Žychara Lidy asudzili na paŭtara hoda kałonii za abrazu Łukašenki. Jaho zatrymali prosta na miažy
Sud Lidskaha rajona razhledzieŭ kryminalnuju spravu palitviaźnia Valeryja Tumileviča, abvinavačanaha ŭ abrazach Łukašenki (č. 1 art. 368 Kryminalnaha kodeksa). Spravu razhladaŭ sudździa Alaksandr Mišuroŭ, paviedamlaje «Viasna».
Da suda lidčanin utrymlivaŭsia ŭ turmie №1 Hrodna.
Palitźniavolenaha Valeryja Tumileviča zatrymali 17 lipienia 2022 hoda, asudzili na 10 sutak administracyjnaha aryštu pa art. 19.11 KaAP, ale na volu jon tak i nie vyjšaŭ. Na Valeryja była zaviedziena kryminalnaja sprava za abrazu Łukašenki (art. 368 Kryminalnaha kodeksa) — nibyta Valeryj abraziŭ jaho, kali znachodziŭsia za miažoj.
Jon praciahły čas znachodziŭsia ŭ Polščy, a kali viartaŭsia ŭ Biełaruś, na miažy jaho zatrymali.
Na druhi dzień, 18 lipienia, u praŭładnych telehram-kanałach źjaviłasia videa z zatrymańniem. U roliku mužčyna tłumačyć, što byŭ zatrymany za toje, što ŭ telehram-čacie abraziŭ Alaksandra Łukašenku i «raspaŭsiudžvaŭ materyjały ekstremisckich kanałaŭ».
Pa materyjałach abvinavačańnia, Valeryj Tumilevič, znachodziačysia va nieŭstanoŭlenym miescy, u telehramie, źjaŭlajučysia aktyŭnym udzielnikam «Hordyja lidčanie čat» i «Čat 97% DKŽ», raźmiaściŭ niekalki paviedamleńniaŭ ź nieprystojnymi pa formie i źnievažalnymi pa źmieście słovami, jakija dajuć niehatyŭnuju acenku Łukašenku, prynižajuć jaho honar i hodnaść i vykazanyja ŭ nieprystojnaj i abraźlivaj formie.
U sudzie svaju vinu pryznaŭ całkam.
Sud pastanaviŭ pryznać Tumileviča vinavatym i pryhavaryŭ jaho da pakarańnia ŭ vyhladzie pazbaŭleńnia voli terminam na adzin hod i šeść miesiacaŭ z adbyvańniem u papraŭčaj kałonii va ŭmovach ahulnaha režymu.
Apielacyjnaja skarha abvinavačanaha, razhledžanaja Hrodzienskim abłasnym sudom 8 listapada, pakinutaja biez zadavalnieńnia.
