«Abjadnaŭ vyjavu Łukašenki i svastyku». Vynieśli prysud žycharu Baranavič Andreju Kasparoviču
U sudzie Baranavickaha rajona i Baranavič 11 listapada zaviaršyŭsia razhlad kryminalnaj spravy ŭ dačynieńni da miascovaha žychara Andreja Kasparoviča, jaki abvinavačvaŭsia ŭ abrazie Łukašenki (č. 1 art. 368 Kryminalnaha kodeksa) i ździeku ź dziaržaŭnych simvałaŭ (art. 370 Kryminalnaha kodeksa), piša «Viasna».
Andreja Kasparoviča zatrymali 28 vieraśnia 2022 hoda. Pa materyjałach abvinavačvańnia, jon 22 studzienia 2021 hoda paśla prahladu ŭ sacyjalnaj sietcy «Adnakłaśniki» publikacyi z vyjavaj Łukašenki ŭ vajskovym mundziry na piarednim płanie i vyjavaj svastyki — na zadnim, raźmiaściŭ hety malunak na svajoj adkrytaj staroncy. Taksama jon pakinuŭ zapis, što «ŭłada karystajecca nacysckaj ideałohijaj, i naša kraina nie źjaŭlajecca demakratyčnaj».
Taksama jon nibyta naŭmysna raźmiaściŭ na svajoj staroncy vyjavu dziaržaŭnaha ściaha Biełarusi ŭ centry svastyki, vykananaj u formie kryža, što kvalifikavali jak ździek sa ściaha.
Svaju vinu ŭ sudzie Kasparovič całkam pryznaŭ i publična prynios Łukašenku prabačeńni.
U vyniku sud pryznaŭ jaho vinavatym i pa adnym artykule, i pa druhim, i pryznačyŭ pakarańnie ŭ vyhladzie abmiežavańnia voli na termin dva hady z nakiravańniem u vypraŭlenčuju ŭstanovu adkrytaha typu.
Spravu razhladaŭ sudździa Mikałaj Kmita, dziaržabvinavaŭcam byŭ staršy pamočnik prakurora Alaksandr Jaraševič.