Śviatłana Cichanoŭskaja pavinšavała «Našu Nivu» z dniom narodzinaŭ
Śviatłana Cichanoŭskaja raźmiaściła ŭ svaim telehram-kanale vinšavańnie «Našaj Nivie» ŭ suviazi ź jaje 116-hodździem.
Fota: Ofis Śviatłany Cichanoŭskaj
«Siońnia dzień narodzinaŭ u adnaho z najstarejšych biełaruskich niezaležnych miedyjaŭ. Z momantu svajho zasnavańnia ŭ 1906 hodzie «Naša Niva» pracuje, aśviatlaje praŭdu, vykryvaje prablemy biełaruskaha hramadstva, pakazvaje na pamyłki, dapamahaje nam ruchacca napierad, a hałoŭnaje — lepš daviedvacca adno adnaho i svaju krainu.
Hety dzień možna ličyć dniom biełaruskaj žurnalistyki, i siońnia ja chaču skazać dziakuj usim sumlennym žurnalistam Biełarusi za ciažkuju, ale takuju važnuju pracu, za addanaść praŭdzie.
Ja chaču skazać dziakuj hałoŭnamu redaktaru «Našaj Nivy» Jahoru Marcinoviču, aŭtaru «Našaj historyi» Andreju Skurko i inšym pradstaŭnikam ŚMI, jakija siońnia siadziać u turmie, za sumlennuju pracu.
Chaču skazać dziakuj redakcyi «Našaj Nivy» i inšym niezaležnym biełaruskim miedyjam! Dziakujučy vam my nabližajemsia da svabodnaj Biełarusi», — adznačyła lidarka biełaruskaha demakratyčnaha ruchu.
