Palitviaźnia Siarhieja Saviča asudzili na try hady kałonii za adno paviedamleńnie ŭ telehramie
Palitviaźnia Siarhieja Saviča pryznali vinavatym u tym, što 15 śniežnia 2020 hoda jon pakinuŭ kamientar u telehram-čacie «Pinsk dla žiźni». Zhodna z pazicyjaj abvinavačańnia, hetym jon zaklikaŭ da hvałtu ŭ dačynieńni da supracoŭnikaŭ milicyi. Sudovy praces razhladała sudździa Valancina Kunickaja, bok dziaržabvinavačańnia padtrymaŭ prakuror Alaksiej Jarošyk, piša «Viasna».
Siarhiej vinu nie pryznaŭ i skazaŭ, što nie pamiataje, kab pisaŭ taki kamientar. Adnak mužčyna adznačyŭ, što dla jaho nie charakternaje takoje vykazvańnie i, chutčej za ŭsio, pa spasyłcy na YouTube, jakuju jon taksama pakidaŭ (videa nieŭzabavie było vydalenaje), byŭ rolik ź niejkim hrubym parušeńniem zakona, praz što jon moh pakinuć takoje emacyjnaje vykazvańnie.
Kamientar, za jaki sudzili Siarhieja Saviča
Akramia taho, na sudzie Savič skazaŭ, što častka jaho znajomych i svajakoŭ pracujuć u orhanach, a pra ich jon nie moh skazać takoje, što napisana ŭ paviedamleńni. Pra pakidańnie takoha niekarektnaha kamientara jon škaduje, ale padkreśliŭ, što sam jon nijak nie źviazany z pratestami ahułam.
Tym nie mienš, prakuror Jarošyk paprasiŭ pryznačyć mužčynu pakarańnie ŭ vyhladzie troch hadoŭ pazbaŭleńnia voli, a sudździa pahadziłasia z hetym terminam.
Siarhieja Saviča zatrymali ŭ pačatku žniŭnia 2022 hoda ŭ Pinsku. Spačatku jaho asudzili na 15 sutak administracyjnaha aryštu pavodle art. 19.11 KaAP za repost z telehram-kanała, ale paśla «sutak» jon nie vyjšaŭ na volu. Tady stała viadoma, što ŭ adnosinach da Saviča taksama zaviedzienaja kryminalnaja sprava pavodle č. 3 art. 361-1 Kryminalnaha kodeksa.
