SK skončyŭ rasśledavańnie spravy Cichanoŭskaj, Łatuški, Dyleŭskaha. Chutka zavočny sud
SK skončyŭ rasśledavać spravu suprać Śviatłany Cichanoŭskaj i Paŭła Łatuški. Palitykaŭ źbirajucca sudzić zavočna. «Śpiecyjalnuju vytvorčaść» suprać ich raspačali ŭ kastryčniku.
Prezidyum Kaardynacyjnaj rady ŭ žniŭni 2020 hoda. Maryja Kaleśnikava i Maksim Znak asudžanyja na vialikija terminy
Śviatłanu Cichanoŭskuju abvinavačvajuć adrazu pa niekalkich artykułach KK: u zdradzie dziaržavie, masavych biesparadkach, stvareńni ekstremisckaha farmavańnia, raspalvańni varožaści, zmovie z metaj zachapić uładu, zaklikach da sankcyj.
Paŭła Łatušku abvinavačvajuć u zaklikach da sankcyj, raspalvańni varožaści, atrymańni chabaru, stvareńni ekstremisckaha farmavańnia.
Rasśledavać hetuju spravu SK zaviaršyŭ mienš čym za paŭtara miesiaca. Razam ź Cichanoŭskaj i Łatuškam zavočna buduć sudzić siabroŭ Kaardynacyjnaj rady Volhu Kavalkovu, Siarhieja Dyleŭskaha, Maryju Maroz. Sprava pieradadzienaja hienprakuroru dla nakiravańnia ŭ sud. Heta aznačaje, što sud projdzie ŭ bližejšyja miesiacy.
A pieršy zavočny sud adbudziecca pa spravie «Čornaj knihi Biełarusi». Jon pačniecca 12 śniežnia.