Što realna dapamahaje ad pachmiella?
Praduktaŭ, jakija, jak śćviardžajecca, dapamahajuć na nastupny dzień paśla burnaj nočy, na rynku mnoha. Što ź ich sapraŭdy dapamahaje?
Fota: vecteezy
Asartymient srodkaŭ ad pachmiella niamała — ad rebrendavanych starych lekaŭ da novych śpiecyjalizavanych sastavaŭ. Ich vytvorcy abiacajuć palohku na nastupny dzień paśla śviat. Pradajucca roznyja šypučyja tabletki, pryznačanyja dla «źniaćcia pachmiella», vadkija elektralityčnyja dabaŭki na noč i navat płastyry ź vitaminam V1. Narešcie, nikudy nie dzieŭsia i kłasičny cytramon.
Što vyklikaje pachmielle?
Pachmielle — pabočny pradukt vostraj admieny ałkaholu. Kali vaš arhanizm pierapracoŭvaje ałkahol, jon rasščaplaje jaho da acetaldehidu — biaskolernaha chimičnaha złučeńnia. Acetaldehid, pa sutnaści, źjaŭlajecca atrutaj; i kali vašamu arhanizmu ciažka jaho mietabalizavać, tady sercabićcio pačaščajecca, i vam moža stać młosna. Akramia taho, niepryjemnyja simptomy pachmiella — patlivaść, dyjareja, młość. Usio heta abiazvodžvaje vaš arhanizm i moža vyklikać mocnyja hałaŭnyja boli.
Noč
Standartnaja parada numar adzin, jak paźbiehnuć pachmiella abo palehčyć jaho, pa-raniejšamu adna: picie ŭ mieru, zapivajcie ałkahol i nie picie na pusty straŭnik.
Vaš vybar ałkaholnych napojaŭ taksama maje značeńnie. Śvietłaje piva, biełaje vino arhanizm, jak praviła, prymaje lahčej. Ciomnyja ałkaholnyja napoi, takija jak burbon, rom, viski i čyrvonaje vino, mohuć vyklikać horšaje pachmielle. Heta adbyvajecca tamu, što praces zakisańnia, jaki paciamniaje ich, vydzialaje złučeńni, zvanyja kanhienierami, jakija mohuć uzmacnić vaša žachlivaje samaadčuvańnie, kali cieła pracuje nad ich rasščapleńniem. Sałodkija kaktejli (u tym liku z hazavanymi napojami) taksama mohuć spryjać drennaj ranicy. Jany pieršapačatkova padvyšajuć uzrovień cukru ŭ kryvi, a potym, kali hety ŭzrovień źnižajecca, vy adčuvajecie stomlenaść i słabaść.
Prymać aśpiryn ci cytramon paśla ŭžyvańnia ałkaholu zabaroniena kateharyčna — heta moža vyklikać jazvu straŭnika. Ale abiazbolvajučaje moža palepšyć vaš stan, kali vy pračniaciesia.
Ranica paśla
Hidratacyja nie mienš važnaja na nastupny dzień, kab palehčyć hałaŭny bol i papoŭnić zapas vadkaści. Dla bolšaści ludziej budzie dastatkova zvyčajnaj pitnoj vady abo hazavanych napojaŭ. Picie vadkaść, pakul vaša mača nie stanie bledna-žoŭtaj.
Zhodna z ahulnapryniatym mierkavańniem, kafiein moža dapamahčy. Kubak kavy, dobry čaj mohuć być takimi ž efiektyŭnymi, jak i kafiein u cytramonie.
Što datyčyć roznych azdaraŭlenčych napojaŭ i płastyraŭ ad pachmiella, mnohija ź ich pa sutnaści źjaŭlajucca vitaminnymi kaktejlami. Ahlad 82 praduktaŭ ad pachmiella vyjaviŭ, što 51 ź ich źmiaščaje adzin abo niekalki vitaminaŭ, jakija pieravyšajuć sutačnuju rekamiendavanuju dozu. Važna papaŭniać vitaminy paśla ŭžyvańnia, ale lepš atrymlivać ich z naturalnych charčovych krynic.
Kłasičny śniadanak — jajki, bulba, syr, harodnina — zabiaśpiečyć vas vitaminami B, C i cynkam u tych ža dozach, što i «srodki ad pachmiella».
Ale hałoŭnaje — nie zabyvacca pra paradu numar adzin. Picie ŭ mieru. Što zanadta — toje nie na zdaroŭje.
