Rasijskija pravaabaroncy zajavili, što tolki piataja častka zavierbavanych zekaŭ zastajucca na froncie
Pa danych Volhi Ramanavaj, kiraŭnicy rasijskaha pravaabarončaha fondu «Ruś sidiaŝaja» pa stanie na studzień 2023 hoda, Jaŭhien Pryhožyn zavierbavaŭ u hrupu «Vahnier» bolš za 50 tysiač zekaŭ. Na froncie, pa jaje słovach, ciapier vajujuć tolki 10 tysiač vahnieraŭcaŭ.
Ramanava kaža, što na pačatak vajny ŭ rasijskich turmach utrymlivałasia paŭmiljona źniavolenych. Pa danych ukrainskaha boku, na kaniec śniežnia 39 tysiač rasijskich zekaŭ było zavierbavana ŭ PVK. «Chutčej za ŭsio, ich užo ciapier za 50 tysiač, — miarkuje jana. — Ź ich ułasna vajujuć na froncie 10 tysiač, tamu što ŭsie astatnija albo zabityja albo 300-ja [paranienyja], albo prapali bieź viestak, albo dezierciravali, albo zdalisia ŭ pałon».
Ramanava kaža, što Pryhožynu hetaja statystyka nie vyhadnaja. «Nu dobra, zabityja, nu dobra, paranienyja. A voś tyja, chto zdaŭsia ŭ pałon i dezierciry sa zbrojaj u Rasiju, jamu voś heta Pucinu pakazvać nielha», — kaža jana.
Tamu, kaža Ramanava, tyja, chto zdaŭsia ŭ pałon abo ŭciok, časta ličacca ŭ Pryhožyna zabitymi, tamu i truny nibyta zabitych vahnieraŭcaŭ dasyłajuć dadomu pustymi, miarkuje Ramanava.
Adsiul i pazasudovyja zabojstvy kuvałdami — kab nie śmieli biehčy.
Ramanava miarkuje, što naŭrad ci kolkaść byłych vahnieraŭcaŭ na vulicach Rasii rezka vyraście i mocna paŭpłyvaje na kryminahiennuju abstanoŭku. Jana kaža, što ciapierašnija siužety pra ščaślivaje viartańnie da mirnaha žyćcia byłych vahnieraŭcaŭ — heta pijar, kab zaachvocić zekaŭ iści na vajnu.
Ale ŭsio heta — lišnija ludzi, kaža jana. Ich sacyjalizacyjaj nichto nie źbirajecca zajmacca, u ich usich — kantrakty z PVK. Usie jany viernucca na vajnu, miarkuje Ramanava. Meta rasijskich uładaŭ — «utylizavać» ich va Ukrainie.
