Pružanca asudzili na dva hady «chatniaj chimii» za abrazu pradstaŭnika ŭłady
U sudzie Pružanskaha rajona 28 śniežnia asudzili Maksima Mickieviča pavodle art. 369 (abraza pradstaŭnika ŭłady) Kryminalnaha kodeksa. Sudździa Vadzim Mazol pryznačyŭ Maksimu dva hady abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaj chimii»). Dziaržabvinavaŭcaj vystupiła staršaja pamočnica prakurora Vieranika Maniec, piša «Viasna».
Maksim prabyŭ u źniavoleńni z 8 pa 10 listapada 2022 hoda. Dalej jamu źmianili mieru strymańnia na padpisku ab niavyjeździe.
Pružanski sud abvinavaciŭ mužčynu ŭ tym, što jon 29 krasavika 2021 hoda pad publikacyjaj u telehram-kanale pakinuŭ abraźlivyja kamientaryi na adras supracoŭnikaŭ dziaržorhanaŭ pa kaardynacyi źniešniepalityčnaj i źniešnieekanamičnaj dziejnaści. Kamientaryj tyčyŭsia tahačasnaha ministra zamiežnych spravaŭ Uładzimira Makieja. Paźniej Mickieviča ŭklučyli ŭ śpis asobaŭ, datyčnych da ekstremisckaj dziejnaści.
Mužčyna pryznaŭ vinu i raskajaŭsia ŭ ździejśnienym.
Maksimu Mickieviču 22 hady, jon maje siaredniuju adukacyju, pracavaŭ raspracoŭščykam syraviny na pružanskim pradpryjemstvie.
