Alena Leŭčanka i Alaksandra Hierasimienia aburylisia spartovym fondam, jaki vykarystoŭvaje ich imiony. Tam adkazali
Pretenzii znakamitych biełaruskich spartsmienak Aleny Leŭčanka i Alaksandry Hierasimieni byli źviazanyja z tym, što na sajcie fondu Athletes for Freedom u raździele «Kansultatyŭnaja rada» prysutničali ich imiony, chacia sami spartsmienki, jak jany paviedamili ŭ sacsietkach, na takoje zhody nie davali.
Alaksandra Hierasimienia, Alaksandr Apiejkin. Fota: instahram Alaksandry Hierasimieni, «Radyjo Svaboda»
Alena Leŭčanka, adna z najlepšych baskietbalistak u biełaruskaj historyi, apisała situacyju ŭ instahramie tak: «U kancy 2020-ha hoda farmavaŭsia novy fond. Mnie pastupiła prapanova być u jaho kansultatyŭnaj radzie (advisory board). Ja staranna vyvučyła ŭsiu infu, jakaja była mnie pradstaŭlena, i pryniała adnaznačnaje rašeńnie nie ŭdzielničać u hetaj inicyjatyvie. Nahadaju, maja admova była atrymanaja jašče ŭ 2020-m hodzie. Ale akazałasia, što na siońnia ja čamuści tam znachodžusia: majo fota i proźvišča ličacca ŭ śpisie «advisory board», i niechta ad majho imia tam niešta robić. Zrazumieła, ja pra heta ničoha nie viedała».
A voś frahmient publikacyi sa staronki słavutaj płyŭčychi Alaksandry Hierasimieni: «Ja patłumačyła moj vychad z BSSF (Biełaruskaha fonda spartovaj salidarnaści. — NN) i skazała, što bolš nijakaha dačynieńnia da jaho nie maju. I zaraz nie razumieju, čamu majo imia vykarystoŭvajecca ŭ zborach srodkaŭ? Čamu majo fota visić na sajcie fondu @athletesforfreedom, jaki supracoŭničaje z @bssf.team? Čamu BSSF parazituje na maim imieni?»
My paprasili prakamientavać situacyju vykanaŭčaha dyrektara Fondu spartovaj salidarnaści Alaksandra Apiejkina — jaho imia, darečy, taksama prysutničaje ŭ śpisie ŭdzielnikaŭ kansultatyŭnaj rady. Alaksandr raspavioŭ, što BFSS pačaŭ supracoŭničać z arhanizacyjaj AFF u 2020 hodzie.
Fota: sacyjalnyja sietki
Athletes for Freedom, pavodle Apiejkina, jašče nie ažyćciaŭlaje nijakaj dziejnaści: «Fond jašče nie maje rehistracyi ŭ sistemie IRS (Padatkovaje ŭpraŭleńnie ZŠA. — NN), tamu nijakaj haspadarčaj dziejnaści nie ździajśniaŭ uvohule, aproč rehistracyjnych pracedur. To-bok nie ładziŭ nijakich zboraŭ i dapamohi, nijakich prajektaŭ. Da momantu rehistracyi ŭ IRS arhanizacyja viadzie prosta infarmacyjnuju pracu.
Paśla vizitu delehacyi Fondu spartovaj salidarnaści ŭ Vašynhton u kastryčniku 2022 hoda było pryniata rašeńnie aktyvizavać pracu. Zaraz AFF raspaŭsiudžvaje infarmacyju pra atletaŭ, jakija robiać mužnyja ŭčynki ŭ abaronu svabody, svajoj radzimy, trahična hinuć. My sprabujem rabić cikavyja nietryvijalnyja dopisy pra ich. Tam jość asobnaja tema — «Atlety ŭ vajnie».
Datyčna situacyi ź Leŭčanka i Hierasimieniaj Alaksandr ličyć, što imiony biełarusak prosta nie prybrali z sajta: «Nakolki ja viedaju, Alena i Alaksandra mieli dačynieńnie da arhanizacyi. Viedaju, što AFF prakamientavaŭ situacyju taksama: jany nie atrymlivali zajaŭ ab vychadzie z arhanizacyi, ale prymuć dopis u sacsietkach za dekłaracyju ab vychadzie. Tamu miarkuju, što jany byli na staroj staroncy sajta arhanizacyi, jakuju źmieniać paśla ichniaha vyjścia. Tak byvaje časam, što ludzi zabyvajucca na inicyjatyvy i prajekty, u jakich jany brali ŭdzieł na samym pačatku pratestaŭ. Liču, što mienavita nieparazumieńnie ŭ tym, što BFSS i AFF — roznyja struktury, i mahło stać padstavaj dla abureńnia».
Na staroncy AFF u sacsietkach visić spasyłka na aŭkcyjon, pryśviečany prodažu rečaŭ hulcoŭ futbolnaha kłuba Manchester City. U publikacyi fond paznačany jak arhanizatar aŭkcyjonu. Apiejkin tłumačyć, što rola AFF u aŭkcyjonie była vyklučna infarmacyjnaja, i dadaje, što infarmacyjnaja padtrymka dabračynnych prajektaŭ — zvyčajnaja praktyka.
Alaksandra Hierasimienia raskazała, što fond AFF uźnik stychijna, kali ŭ 2020 hodzie pačaŭsia zbor hrošaj na dapamohu represavanym. Paźniej kiraŭnikoŭ BFSS, jakimi tady byli i Hierasimienia, i Apiejkin, zaprasili ŭziać udzieł u pracy AFF.
«My navat padpisvali papiery na ŭstupleńnie, ale trochi paźniej, praz paru miesiacaŭ, zrazumieli, što rašeńnie było zaŭčasnaje, i dali vusny i piśmovy adkaz (juryst rychtavaŭ papiery) ab vychadzie sa składu. Pieršapačatkova my byli ŭ składzie fondu, ale ŭžo dva hady nie viedali, što fond jašče isnuje i tym bolš niejak funkcyjanuje», — patłumačyła nam Alaksandra.
Hierasimienia ŭpeŭnienaja, što jaje imia prysutničała na sajcie fondu nievypadkova. Jana tłumačyć: «Zajaviła pra heta adkryta, bo pad majo imia, imavierna, źbiralisia srodki. Nie chaču, kab ludzi byli padmanutyja, nibyta ja niejkim čynam źviazanaja z hetym fondam».
U sacsietkach AFF tym časam źjaviłasia aficyjnaja zajava z hetaj nahody.
«Imiony niekatorych raniej aktyŭnych udzielnikaŭ fondu nie byli prybranyja svoječasova, i heta było čałaviečaj pamyłkaj, — havorycca ŭ zajavie. — Častkova jana źviazanaja z faktam, što fond nie atrymaŭ aficyjnuju zajavu ab sychodzie ad niekatorych členaŭ, jakija aktyŭna ŭdzielničali ŭ arhanizacyi na rańnim etapie».
Taksama, jak śćviardžajecca ŭ zajavie, fond AFF pakul što nie atrymaŭ aficyjnaha statusu i padčas zatrymki, źviazanaj z afarmleńniem papier, nie pravodziŭ nijakich mierapryjemstvaŭ, źviazanych sa zboram hrošaj, nie vykarystoŭvaŭ imion byłych udzielnikaŭ u svajoj dziejnaści.
Sam fond, zhodna ź infarmacyjaj u sacsietkach, bazirujecca ŭ amierykanskim štacie Virdžynija. Ciažka skazać, jaki na siońnia skład zasnavalnikaŭ. Ciapier u śpisie kansultatyŭnaj rady fonda prysutničajuć Dźmitryj Dubahrajeŭ, juryst, i Alaksandr Apiejkin, a taksama Andrej Marozaŭ — były spartovy žurnalist z Rasii, jaki zaraz, pavodle jaho fejsbuka, pracuje ŭ kłubie pa fiechtavańni Cardinal Fencing Club. U sacsietkach fonda jaho suzasnavalnikami taksama nazvanyja biełaruski lohkaatlet Andrej Kraŭčanka i jaho ŭkrainskaja kaleha Volha Saładucha.
«Naša Niva» — bastyjon biełaruščyny
PADTRYMAĆBaskietbalistka Alena Leŭčanka pierajechała z Hrecyi i raskazała pra novuju pracu
«Ja dam rady». Hierasimienia raskazała, što razvodzicca z mužam
MAK patłumačyŭ, jak represavanyja biełaruskija spartsmieny zmohuć vystupić na Alimpijadzie-2024
