Muž nie złaviŭ. Strašnaja śmierć himnastki ŭ cyrku šakavała cełuju krainu
Suń Moumou vystupała sa svaim mužam, jaki nie zdoleŭ złavić jaje paśla vykanańnia truka. Pa najaŭnych paviedamleńniach, jana sarvałasia z 10-mietrovaj vyšyni, piša Bi-bi-si.
Shangyou News
Vidavočcy kažuć, što paśla padzieńnia jana jašče dychała, ale vyratavać jaje daktaram nie ŭdałosia.
Ułady ŭžo zajavili, što viaduć rasśledavańnie, u tym liku nakont taho, čamu pad trapiecyjaj nie była raściahnutaja strachovačnaja sietka.
Pavodle infarmacyi kitajskaj haziety Global Times, kitajskaja asacyjacyja akrabataŭ aficyjna zaklikała artystaŭ nie hrebavać srodkami biaśpieki.
Para vystupała ŭ vioscy na impravizavanaj scenie. Vidavočcy adznačyli, što mašynie chutkaj dapamohi było składana dabracca da miesca, dzie adbyŭsia niaščasny vypadak, tamu što darohi ŭ vioscy vielmi vuzkija.
Hibiel Suń Moumou vyklikała burnuju reakcyju ŭ sacsietkach. Hałoŭnyja kamientaryi tyčacca taho, što akrabaty vystupali biez strachovačnych srodkaŭ, kab efiektniej vyhladać i bolš zarabić. Kampanija, jakaja arhanizavała vystupleńnie, padvierhnułasia rezkaj krytycy za hrebavańnie mierami biaśpieki.
Kitajskija ŚMI taksama paviedamili, što, pavodle najaŭnych archiŭnych videazapisaŭ, mnohija vystupy, arhanizavanyja hetaj firmaj, taksama prachodzili biez strachovačnych srodkaŭ. Viadučy pradstaŭleńnia, padčas jakoha adbyłasia trahiedyja, navat padkreślena źviarnuŭ uvahu hledačoŭ na adsutnaść strachoŭki, kab padahreć ažyjataž.
Miascovy Departamient kultury i turyzmu paviedamiŭ, što trupa nie atrymała dazvołu na praviadzieńnie vystupu, i što ź imi «pastupiać adpaviednym čynam». U minułym jaje ŭžo štrafavali za parušeńnie praviłaŭ.
U minułym hetaja para akrabataŭ niaredka vykonvała truki na vialikaj vyšyni biez strachoŭki, pakolki za vystupy, źviazanyja z pavyšanaj ryzykaj, płaciać bolš vysokija hanarary.
