Stvarajecca Mižnarodny fond u padtrymku biełaruskich palitviaźniaŭ. Narviehija užo dała 850 tysiač jeŭra
Ź inicyjatyvy Śviatłany Cichanoŭskaj stvarajecca Mižnarodny humanitarny fond u padtrymku biełaruskich palitviaźniaŭ. Fond budzie nakiravany na padtrymku siemjaŭ represavanych i byłych palitviaźniaŭ, paviedamlaje ofis palityka.
Premjer-ministr Narviehii Junas Stere padčas sustrečy sa Śviatłanaj Cichanoŭskaj. Fota: pres-słužba Cichanoŭskaj
Padtrymka budzie ŭklučać u siabie, u tym liku, miedycynskuju dapamohu i reabilitacyju, materyjalnuju i psichałahičnuju dapamohu vyzvalenym palitviaźniam i asobam, jakija zaznali palityčnyja represii.
Premjer-ministr Narviehii Junas Stere padčas sustrečy sa Śviatłanaj Cichanoŭskaj skazaŭ, što Narviehija ŭnosić 10 miljonaŭ narviežskich kron (850 tysiač jeŭra) — jak pieršy ŭniosak u hety fond. Rasparadžacca fondam buduć biełaruskija arhanizacyi i inicyjatyvy, jakija dapamahajuć palitviaźniam.
Ministerstva zamiežnych spravaŭ Narviehii pracuje nad farmalizacyjaj pracy fondu. Unieści srodki ŭ fond zmohuć inšyja ŭrady, mižnarodnyja arhanizacyi i inšyja patencyjnyja donary.
Ź inicyjatyvaj stvaryć taki fond lidarka biełaruskaha demakratyčnaha ruchu Śviatłana Cichanoŭskaja vystupiła ŭ minułym hodzie.
Ministr zamiežnych spraŭ Narviehii Eśpien Bart Ejde padtrymaŭ ideju stvareńnia mižnarodnaha humanitarnaha fondu: «Situacyja z palitviaźniami ŭ Biełarusi vielmi tryvožnaja. Takaja dapamoha vielmi patrebnaja dla reabilitacyi byłych palitviaźniaŭ i ich siemjaŭ».
U paniadziełak i aŭtorak na hetym tydni Cichanoŭskaja znachodzicca ŭ Osła.
Čytajcie taksama:
