Stała viadoma, što było na mierčy, z-za jakoha prajšła abłava na kancercie «Karozii mietału»
Pryčynaj taho, što siłaviki ŭvarvalisia ŭ kłub, dzie prachodziŭ kancert treš-mietał-hurta «Karozija mietału», mahli stać vokładka alboma i mierč z vyjavaj Pucina. Takuju zdahadku vysunuŭ kanał «DNOvosti».
Kanał piša, što «Karozija mietału» pieravydała svoj albom 96 hoda «Zatrymajcie ciahnik i zabicie mašynista», na vokładcy jakoha namalavany Pucin, jaki ŭzvyšajecca nad ciahnikom, a taksama podpis «Zabicie mašynista».
Aproč alboma, hurt vypuściŭ mierč z toj ža vyjavaj, što i na vokładcy.
Taksama adznačajecca, što ŭ albom bonus-trekam uvajšła pieśnia «Čałaviek sa šramam» z aryhinalnym tekstam: «Nikoli nie daviaraj čałavieku sa šramam, palcy jaho ruk ślizhajuć pa tabie. Hety čałaviek z zubami vampira — Pucin, lubić trupy ŭ Dniaproŭskaj vadzie!»
Uviečary 27 krasavika Rashvardyja ŭvarvałasia ŭ kłub «Nianaviść», dzie prachodziŭ kancert treš-mietał-hurta «Karozija mietału». Miarkujučy pa videa, hledačam zahadali lehčy tvaram u padłohu, niekatorych ź ich źbili.
Lidara hurta Siarhieja «Pavuka» Trajeckaha i dvuch hitarystaŭ dastavili ŭ adździeł palicyi. Im pastavili ŭ vinu prapahandu nacysckaj simvoliki. Pa słovach dyrektara hrupy Maryi Runovaj, padstavaj dla zatrymańnia staŭ mierč hrupy, na jakim byli namalavanyja «staražytnasłavianskija simvały ŭ vyhladzie roznych vobrazaŭ sonca z zahnutymi pa kruzie promniami».
Paźniej Siarhiej Troicki zajaviŭ, što bubnač «Karozii mietału» trapiŭ u komu paśla zatrymańnia na kancercie, a hurt spyniaje dziejnaść.
Čytajcie taksama:
Niečakany praciah karjery Sašy Hrej. Čym ciapier zajmajecca byłaja zorka filmaŭ dla darosłych?
Niaviestka Łukašenki atrymała ŭ Rasii dypłom na premii «Šanson hoda — 2024»