Kandydata ŭ Kaardynacyjnuju radu ad «Narodnaj Hramady» vykinuli sa śpisu, bo jon danosčyk. Stukaŭ na Aŭtuchoviča
U telehram-kanale partyi Narodnaja Hramada, jakaja idzie na vybary ŭ Kaardynacyjnuju radu ŭ sajuzie z častkaj chryścijanskich demakrataŭ, źjaviłasia infarmacyja pra vyklučeńnie sa śpisu adnaho sa svaich siabroŭ, jaki zaśviaciŭsia ŭ źlitaj «Kibierpartyzanami» bazie zvarotaŭ u KDB.
Pavodle paviedamleńnia, unačy 30 krasavika partyja atrymała infarmacyju, što adzin ź jaje aktyvistaŭ, Pavieł Bialucin, źjaŭlajecca fihurantam paviedamleńnia z bazy, prytym rola jahonaja tam niepryhladnaja. U suviazi z hetym nieadkładna pryniata rašeńnie:
1. Prypynić siabroŭstva Bialucina Paŭła ŭ partyi Narodnaja Hramada;
2. Vyklučyć Bialucina Paŭła ź śpisu kandydataŭ u Kaardynacyjnuju Radu III sklikańnia ad Abjadnańnia biełaruskich partyj Narodnaja Hramada i Biełaruskaja Chryścijanskaja Demakratyja «Salidarnaść».
Paviedamleńnie, za jakoje adnosna Bialucina było pryniata takoje chutkaje rašeńnie, było napisana 31 studzienia 2017 hoda i hučała tak:
«Dobry dzień. U mianie jość niekatoryja padstavy mierkavać, što hramadzianin RB Aŭtuchovič Mikałaj Mikałajevič pradumvaje i pačynaje ažyćciaŭlać padrychtoŭku da sproby ŭzbrojenaha zachopu ŭłady ŭ našaj respublicy. Pra sprobu daviedaŭsia sa słoŭ hr. Aŭtuchoviča M.M.»
Nahadajem, što 61-hadovy Mikoła Aŭtuchovič z pačatku śniežnia 2020 hoda adbyvaje ŭžo treciaje ŭ svaim žyćci źniavoleńnie. Pavodle prysudu Hrodzienskaha abłasnoha suda jon atrymaŭ 25 hadoŭ źniavoleńnia i hrašovy štraf u 1000 bazavych vieličyń, a taksama pazbaŭleńnie zvańnia praparščyka ŭ adstaŭcy. Pieršyja 5 hadoŭ źniavoleńnia były pradprymalnik i pravaabaronca musić adbyć u turmie, astatnija 20 hadoŭ — u kałonii strohaha režymu.
Sud nazvaŭ Aŭtuchoviča vinavatym pavodle 10 artykułaŭ Kryminalnaha kodeksa, u tym liku ŭ stvareńni złačynnaj hrupoŭki i akcie teraryzmu. Svajoj viny Mikałaj Aŭtuchovič nie pryznaŭ, padčas pracesu jon trymaŭ haładoŭku pratestu.
Biełaruskija pravaabaroncy pryznali Mikałaja Aŭtuchoviča palitviaźniem.
Lidaram partyi Narodnaja Hramada źjaŭlajecca inšy viadomy palitviazień — Mikałaj Statkievič, jaki ciapier adbyvaje 14-hadovy prysud u kałonii asobaha režymu ŭ Hłybokim.
Čytajcie taksama:
Kiraŭnica pradstaŭnictva «Biełavija» ŭ Čechii patrabavała ad KDB daviedku ab stažy
U 2020-m muž schłusiŭ KDB, što žonka ŭdzielničaje ŭ mitynhach, tamu što «siamja razvalvałasia»
U KDB danieśli navat na Viktara Kalinu
Biełarusy napisali 40 tysiač danosaŭ? Nie, heta niepraŭdzivaje śćvierdžańnie
