Žančyna, jakaja stała pratatypam stałkieršy z «Alenianiaci», prystrašyła sudom hałoŭnamu hieroju
Jana pryznała, što była znajomaja z Ryčardam Hedam, ale admaŭlaje, što napisała jamu tysiačy listoŭ.
Kadr ź sieryjała
Žančyna pa imieni Fijona Charvi, jakaja stała pratatypam stałkieršy ŭ sieryjale «Aleniania» Ryčarda Heda, zasnavanym na historyi ź jaho asabistaj bijahrafii, dała vialikaje intervju brytanskamu televiadoŭcu Pirsu Morhanu. U im jana adkinuła abvinavačvańni ŭ pieraśledzie Heda i paabiacała padać u sud na jaho i na kampaniju Netflix, piša «Mieduza».
Žančyna dała intervju paśla taho, jak prychilniki «Alenianiaci» pasprabavali vyličyć stałkieršu, jakaja pieraśledvała Heda ŭ realnaści, i pryjšli da vysnovy, što heta Charvi. Sam Hed raniej zapeŭnivaŭ, što źmianiŭ u sieryjale detali bijahrafii svajoj pieraślednicy, kab jaje nie paznali.
U intervju Charvi zajaviła, što nie hladzieła sieryjał, ale vykazała ŭpeŭnienaść, što hierainia «Alenianiaci» — heta jana. Žančyna raspaviała, što jašče niekalki hadoŭ tamu bačyła frahmienty adnajmiennaha śpiektakla Heda i ŭžo tady zrazumieła, što havorka pra jaje.
Svoj vobraz u sieryjale Charvi nazvała «paklopam» i abvinavaciła Ryčarda Heda i Netflix u chłuśni. «Jany zajavili heta jak realnuju historyju, ale heta niapraŭda», — skazała Charvi i dadała, što źbirajecca padać u sud na komika i stryminhavy servis.
Charvi zajaviła, što nie pieraśledvała Heda, nie pisała jamu «dziasiatki tysiač imejłaŭ i sotniu listoŭ», a na pytańnie viadučaha pra toje, chto ž tady adpraviŭ usie hetyja paviedamleńni, jana adkazała: «Moža, jon sam ich vydumaŭ. Biez paniaćcia». «Ja dumaju, u jaho rasstrojstva psichiki», — skazała jana pra režysiora.
Viadoŭca Pirs Morhan niekalki razoŭ padčas hutarki viartaŭsia da listoŭ, i Charvi ŭrešcie pryznała, što «mahła napisać niekalki imejłaŭ i adzin list ad ruki», — ale padkreśliła, što da astatnich nie maje dačynieńnia. Jana taksama raspaviała, što dla znosin z roznymi ludźmi vykarystoŭvaje čatyry telefony.
Pry hetym Charvi paćvierdziła, što sapraŭdy paznajomiłasia z komikam u łondanskim pabie the Hawley Arms i što žartam nazvała jaho «alenianiom», paśla taho jak jon pastryhsia nałysa
Ryčard Hed i Netflix pakul nie kamientavali zajavy Fijony Charvi.
***
Sieryjał «Aleniania» vyjšaŭ na Netflix u pačatku krasavika i składajecca ź siami epizodaŭ. Heta film pra komika-niaŭdačnika i žančynu, jakaja jaho pieraśleduje. Sieryjał akazaŭsia ŭ topie Netflix i atrymaŭ 97% uchvaleńnia krytykaŭ na ahrehatary recenzij Rotten Tomatoes. U asnovie lažyć realnaja historyja Ryčarda Heda.
Čytajcie taksama:
Žanočaja łaźnia, Ejnštejn i Miesi. 7 novych dakumientałak na vychadnyja
Pamior brytanski akcior — zorka «Hulni tronaŭ»
Biełarus źniaŭsia ŭ papularnym amierykanskim sieryjale i raskazaŭ, što było na zdymačnaj placoŭcy
