«Biełarusbank» adkryŭ kredyt «nie dla ŭsich»
Padazrony varyjant sa staŭkaj, nižejšaj za rynkavuju, praisnavaŭ tolki paru dzion.
Ad pačatku lipienia «Biełarusbank» zapuściŭ kredytnuju prapanovu «Śviatkujem razam». Jana musiła dziejničać da kanca 2012, pryčym z nadzvyčaj vyhadnymi ŭmovami: suma da 20 miljonaŭ rubloŭ vydavałasia na 1,5 hoda pad 29% hadavych. Heta na 3% nižej za tahačasnuju staŭku refinansavańnia. Hrošy mahli adrazu być vydadzienyja najaŭnymi, pryčym atrymać ich možna było biez paručalnikaŭ, a dla razhladu zajavy navat nie musiŭ sklikacca kredytny kamitet.
Dla paraŭnańnia, siarod inšych bankaŭ samuju blizkuju prapanovu mieŭ «Fransabank» (35%), a astatnija vydavali najaŭnyja hrošy biez paručalnikaŭ pad 43% i bolš.
Atrymałasia padazronaja schiema. Klijenty «Biełarusbanka» mahli atrymać hrošy pad 29% i adrazu ž pakłaści ich u bank na depazit pad 31,5–35% ci nabyć ablihacyi sa staŭkaj 43–47%. Zarabić na hetym pahadziŭsia b kožny — napiaredadni devalvacyi 2011 hoda pradbačlivyja biełarusy taksama panabirali spažyvieckich kredytaŭ, jakija za paru miesiacaŭ źjeła inflacyja.
Pa pryčynie śviataŭ u pačatku miesiaca kredyt «Śviatkujem razam» faktyčna pačaŭ pracavać tolki 4 lipienia, biez rekłamnaj kampanii i anonsaŭ.Pra jaho niama nivodnaj zhadki navat na sajcie banka. I ŭžo praz tydzień, 12 lipienia, unutranym rasparadžeńniem vydača hrošaj była prypynienaja na niavyznačany termin. Jak patłumačyli ŭ infarmacyjnaj słužbie «Biełarusbanka», pastupiła zašmat zajavak na kredyt. Situacyja vyhladaje absurdnaj: bank robić kamiercyjnuju prapanovu, adnak nie choča, kab joj karystalisia klijenty.
Kolki čałaviek paśpieli atrymać tannyja hrošy dziaržaŭnaha banka ŭ pieršyja dni pracy «Śviatkujem razam» i chto hetyja ludzi — kamiercyjnaja tajamnica, jakaja musiła b zacikavić kantralujučyja orhany.
