Ułady spadziajucca źnizić spažyvańnie alkaholu na čałavieka z 9,5 da 7,8 ł u hod.
Na pačatak hodu licenzii na vytvorčaść alkaholu ŭ krainie mieli 127 pradpryjemstvaŭ. Pavyšeńnie ich abjomaŭ prodažu za apošnija hady vyklikała rost vypadkaŭ alkahalizmu. Z 1990 h. alkaholikaŭ-mužčynaŭ stała bolš utraja, žančyn — u čatyry razy.
Kab abmiežavać vypusk śpirtnoha, urad zaćvierdziŭ prahramu raźvićcia alkaholnaj pramysłovaści na 2006—2010 h. Jana praduhledžvaje skaračeńnie licenzijaŭ na vytvorčaść alkaholu j źmienu struktury vytvorčaści na karyść «jakasnych i naturalnych napitkaŭ». Majucca na ŭvazie harełka i raźlityja ŭ Biełarusi vinahradnyja viny, jakija nichto ŭ śviecie nie ličyŭ by naturalnymi, ni tym bolš jakasnymi.
Vypusk harełki j likiora-harełačnych vyrabaŭ letaś skłaŭ 7,4 młn dekalitraŭ (u 2000 h. było ŭdvaja mieniej). Da 2010 h. kolkaść vytvorcaŭ budzie skaročana na tracinu. Niekatoryja pradpryjemstvy pieraprafilujuć. Haradzienski i klimavicki zavody buduć vypuskać pakietavanyja soki, homielski — kvas.
Adnačasova planujecca zabiaśpiečyć rost ekspartu, jaki chočuć pavysić u 9 razoŭ u paraŭnańni z uzroŭniem 2005 h. Dziela hetaha miarkujecca madernizavać najlepšyja likiora-harełačnyja zavody — «Miensk-Kryštal», homielski, bieraściejski j viciebski.
Zakranuć źmieny i vytvorčaść pładovych vinaŭ. Letaś ich było vypuščana 26,4 młn dekalitraŭ, u čatyry razy bolej, čym u 2000 h. (6,6 młn.) Ciapier ža vytvorčaść pładovych vinaŭ chočuć skaračać na karyść vinahradnych vinaŭ i kańjaku ź impartnych vinamateryjałaŭ.
Z 2008 h. pładovyja viny buduć vyrablać tolki z ajčynnaj syraviny. Na vasiamnaccaci zavodach vyrab «Kryžačkoŭ» budzie spynieny, što skarocić vytvorčaść na 2,5 młn dekalitraŭ. Zatoje pavialičycca kolkaść pradpryjemstvaŭ — vytvorcaŭ vinahradnaha vina, z 31-ho da 37-mi.
Ličba vytvorcaŭ kańjaku pavialičycca z šaści da vaśmi. Novyja kańjačnyja linii buduć stvorany ŭ Bieraści j Homieli.
Pavodle dekretu prezydenta, jaki nabudzie siłu 13 śniežnia, kolkaść vytvorcaŭ i handlovych subjektaŭ na alkaholnym rynku skarocicca — dekret zabaraniaje vieści biznes indyvidualnym pradprymalnikam dy ŭstaloŭvaje žorstkija ŭmovy dla aptavikoŭ. Zastaniecca mienš za 10% kampanijaŭ. U adpaviednaści z dekretam dla atrymańnia licenzii na aptovy handal alkaholem pradpryjemstva musić mieć statutny fond nia mienš za 100 tys. eŭra, składy płoščaj bolš za 1 tys. m² i zajmacca aptovym handlem nia mienš za piać hadoŭ.
Meta ŭsich novaŭviadzieńniaŭ — źmianšeńnie kolkaści spažyvańnia čystaha alkaholu na adnaho čałavieka ŭ hod — z 9,5 ł u 2004-m da 7,8 ł u 2010-m. Pakul Biełaruś bje ŭsie admoŭnyja rekordy. Letaś abjom prodažu alkaholnych napojaŭ u pieraliku na čysty śpirt skłaŭ 9,5 ł, što na paŭtara litra pieravyšaje maksymalny ŭzrovień, vyznačany Suśvietnaj arhanizacyjaj achovy zdaroŭja.
