Pieršy pijar Milinkieviča
Hit-parad muzyčnaha sajtu «Tuzin hitoŭ» budzie kamentavać Aleś Milinkievič. Dahetul ekspertami vystupali K.Kamockaja, Ł.Volski, A.Pamidoraŭ. Kaardynatar prajektu Alaksiej Minčonak kaža, što na «TH» zaŭsiody tury kamentavali cikavyja asoby. Siarod ich byli muzyki i pradusery, a voś palitykaŭ jašče nie było. Tamu j vyrašyli zaprasić Milinkieviča, viedajučy jahonuju luboŭ da biełaruskaj muzyki.
Na Tut.by-jeŭskim forumie heta ŭžo nazvali «pieršym udałym pijar-chodam adzinaha» :).
Dysk Dančyka
«BMA group» vydała kampakt-dysk ź pieśniami Bahdana Andrusišyna, jakija 20 hadoŭ tamu byli zapisanyja ŭ Ńju-jorskaj studyi Angel Sound i vyjšli na kružełcy «Ja ad vas daloka». Svojeasablivym «videabonusam» vystupaje zapis kancertu Dančyka ŭ mienskaj filarmonii ŭ 1996 h. Sam śpiavak i redaktar biełaruskaj słužby radyjo «Svaboda» zajaviŭ, što nie miarkuje ładzić z nahody vychadu dysku kancert, bo nia ličyć siabie padrychtavanym. «BMA group» planuje pieravydać na kampakt-dyskach usie albomy śpievaka.
«Saša i Siroža» šukajuć talenty
Viadomy teleduet źbirajecca ekranizavać uvieś debiutny albom «Ska-ty!». Chutka źjavicca ŭžo čaćviorty videarolik. Hetym razam abrali pieśniu «Novy hod». U klipie budzie prysutničać scena masavaj fizzaradki. «SiS» zaprašajuć u joj źniacca ŭsich achvotnych. Zdymki tre było dasyłać da 1 listapada na e-mail: [email protected], ale dla asablivych achvotnikaŭ termin budzie padoŭžany.
«Bardaŭskaja vosień»
U festyvali «Bardaŭskaja vosień-2005» na Biełastoččynie hałoŭny pryz (mahčymaść zapisać albom u prafesijnaj radyjostudyi) nie atrymaŭ nichto. Prafesijnuju hitaru atrymała bardaŭskaje tryjo z Polščy (Iłona Karpiuk, Mažena Rusačyk, Andrej Hreś), bardy ź Biełarusi Illa Papłoŭka j Andrej Kaścień — pa 10 hadzin studyjnaha zapisu.
Pager-vieršy Łabadzienki
Nakładam 300 asobnikaŭ ubačyła śviet kniha Hleba Łabadzienki «Pager-vieršy: načnaja liryka». Pradmovu da knihi napisaŭ Ryhor Baradulin, paślamovu — Andrej Chadanovič. Kniha vyjšła za srodki samoha aŭtara. Pager-vieršy — tvory, dasłanyja aŭtaram praz pejdžar. U knizie jany padajucca z asablivaściami «nieźbiełaruščanaha» pejdžara: z «1» zamiž «i», biaź litar «jo» dy «ŭ».
Adam Voršyč
