Napiaredadni vybaraŭ praca niezaležnych infarmacyjnych sajtaŭ moža być paralizavana. Prahramisty šukajuć adekvatny adkaz.
Na minułych prezydenckich vybarach takoje zdaryłasia — 9 vieraśnia 2001 h. niezaležny Biełnet byŭ paralizavany. Majučy adnaho pravajdera-manapalista, takoje zrabić nieskładana. Chodziać čutki, što hetym razam specyjalisty ŭpraŭleńnia infarmacyjnaj biaśpieki KDB pajšli dalej. Nibyta hatovyja admysłovyja filtry dla pavyšeńnia kantrolu za Biełnetam. Jany zroblenyja na kitajski ŭzor.
«Raniej možna było blakavać dostup biełaruskich karystalnikaŭ na peŭnyja servery. Kali ŭviaduć kitajskija hłušyłki, budzie mahčymaść zabaranić padłučeńnie z peŭnym karystalnikam», — zaznačaje internet-fundatar Viecier Mechaničny. Heta aznačaje, što cikaŭny, nabirajučy ŭ pošukaviku słovy «Milinkievič» ci «apazycyja», nia zdoleje trapić na patrebnyja sajty. Bolš za toje, źviestki kamputara karystalnika buduć uniesienyja ŭ «čorny śpis», a dostup da sieciva abmiažujecca.
Hieneralny dyrektar «Tut.by» Kirył Vałošyn śćviardžaje, što całkam blakavać Internet niemahčyma: «Realna tolki časova paralizavać pracu peŭnych chostynh-centraŭ i samich staronak». Vałošyn zhadvaje, što na pačatku hodu kamisija pa praduchileńni prapahandy parnahrafii, hvałtu i žorstkaści pryniała rašeńnie ab blakavańni «Biełtelekamam» niekalkich rasiejskich parnasajtaŭ. «Ale takim ža čynam moža być zablakavany luby sajt», — dadaje K.Vałošyn.
Jość niekalki sposabaŭ zaścierahčysia ad virtualnaj cenzury. Samy prosty — padpisacca na stužki navin (usie biełaruskija infarmacyjnyja sajty prapanujuć takuju pasłuhu). Vyjście, dla tych, chto maje svaje internet-staronki, — RSS, ci mažlivaść retranślacyi stužki navin. Viecier Mechaničny bačyć u hetym vialikija mahčymaści: «Tranślavać naviny ź infarmacyjnych sajtaŭ moža kožny ŭładalnik chatniaj staronki ci mini-sajtu. Takija sajty prosta fizyčna niemahčyma adsačyć. Tolki ŭsim razam možna zmahacca z hetaj navałaj». Pastavić kod z sajtu na svajoj veb-staroncy moža kožny prahramist. I navat kali asnoŭny sajt budzie zablakavany, retranślacyja navinaŭ ź jaho na inšych sajtach budzie praciahvacca.
Treci varyjant bolš składany, ale samy efektyŭny — skarystacca ananimnym proksi-serveram. Pasłuha ananimizacyi, jak praviła, płatnaja: možna zajści na peŭny sajt, zarehistravacca i ŭ jaho abałoncy prahladać jakija chočaš staronki — takoha karystalnika niemahčyma adsačyć, i nijaki «Biełtelekam» nia moža pierakryć jamu dostup. Vialiki śpis ananimnych proksi-serveraŭ možna znajści na www.epic.org/privacy/tools. Sproščanuju i biaspłatnuju versiju ananimnaha proksi-servera — ananimajzer, jaki taksama dazvalaje zastacca niezaŭvažnym u Biełnecie, — možna ŭbačyć na http://byelarus.com/members. Dobraachvotniki raspracoŭvajuć jašče niekalki varyjantaŭ. Na kožny krok cenzury, miarkujuć jany, musić być adekvatny adkaz. Inakš u nastupnym hodzie Biełaruś moža pieratvarycca ŭ novuju Paŭnočnuju Kareju.
