«U častcy Kamiteta dziaržbiaśpieki, MUS, usich pravaachoŭnych orhanaŭ my vyjdziem na toje, što patrebna budzie rekamiendacyja Sajuza moładzi, kab pracavać na hetaj nivie, i tamu ŭ hetym płanie budzie ŭzmacniacca rola maładziožnaj arhanizacyi», — Łukašenka publična ahučyŭ toje, što daŭno stała normaj. Pryčym nie tolki ŭ KDB i MUS. Pa palityčnaj prykmiecie adbirajuć navat kantraktnikaŭ u vojska. Siabroŭstva ŭ BRSM było abaviazkovaj umovaj dla słužby pa kantrakcie jašče 10 hadoŭ tamu, kali ja słužyŭ.
Z 2003-ha pa 2004-y hod mnie daviałosia słužyć u radyjotechničnym pałku asablivaha pryznačeńnia. Adnojčy nas sabrali ŭ kłubie na sustreču z sakratarom rajonnaj arhanizacyi BRSM. Toj adrazu ž pierajšoŭ da pieraliku bonusaŭ, jakija moža atrymać siabar arhanizacyi ŭ Navahrudku i rajonie. U pryvatnaści, abiacałasia spryjańnie ŭ pracaŭładkavańni, źnižki ŭ šerahu kramaŭ.
A naprykancy sustrečy na scenu vyjšaŭ adzin z namieśnikaŭ kamandzira pałka i padkreśliŭ, što ŭstupleńnie ŭ BRSM abaviazkovaje dla tych, chto žadaje praciahnuć słužbu ŭ vojsku pa kantrakcie.
Voś taki padzieł na hramadzian pieršaha i druhoha hatunku ŭ zaležnaści ad palityčnych pohladaŭ. Taki samy, jaki byŭ u SSSR i nacysckaj Hiermanii.
