MZS abvierh infarmacyju pra 600 tys. viz dla kitajskich rabočych 4

Pres-sakratar MZS Biełarusi Andrej Savinych nazvaŭ «łuchtoj i fienamienalnym hłupstvam» infarmacyju rasijskaha internet-resursu «Hazieta. Ru» pra vydaču biełaruskich viz dla 600 tysiač kitajskich rabočych.

13 śniežnia rasijski resurs sa spasyłkaj na «pastajannuju i nadziejnuju krynicu „Haziety. Ru“ ŭ biełaruskim Saŭminie» paviedamiŭ, što adpaviednyja dakumienty pra vydaču viz dla 600 tysiač kitajskich rabočych, jakija pavinny pracavać na budaŭnictvie biełaruska-kitajskaha technaparku ŭ Smalavičach (Minskaja vobłaść), byli padpisany jašče letam.

Savinych paviedamiŭ BiełaPAN, što ŭ 2012 hodzie konsulskimi ŭstanovami Biełarusi było vydadziena prykładna 400 tys. viz zamiežnym hramadzianam, u tym liku viz z pravam na pracu — pryblizna tysiaču.

Jon adznačyŭ, što hetyja ličby supastaŭnyja sa źviestkami statystyki minułaha hoda. Pra kolkaść viz, vydadzienych hramadzianam Kitaja, Savinych nie skazaŭ. Pavodle jaho słoŭ, u nastupnym hodzie nie płanujecca pašyrać štat konsulskaha adździeła ŭ pasolstvie Biełarusi ŭ Kitai z metaj vydačy bolšaj kolkaści viz.

Infarmacyju ab pryciahnieńni ŭ Biełaruś 600 tys. kitajskich budaŭnikoŭ, raspaŭsiudžanuju ŭ ŚMI, Savinych prakamientavaŭ tak: «Heta łuchta i fienamienalnaje hłupstva».

Mižuradavaje biełaruska-kitajskaje pahadnieńnie ab stvareńni sumiesnaha industryjalnaha parku było padpisana ŭ Minsku ŭ vieraśni 2011 hoda i ŭ śniežni — ratyfikavana parłamientam Biełarusi. 5 červienia 2012 hoda ŭkaz ab stvareńni biełaruska-kitajskaha industryjalnaha parku padpisaŭ Alaksandr Łukašenka. Pad budaŭnictva vydzialajecca płošča 8 tys. 48 ha. Industryjalny park budzie ŭjaŭlać saboju asobnuju ekanamičnuju zonu, nadzielenuju na 50 hadoŭ śpiecyjalnym pravavym režymam. Pryjarytetnyja kirunki, vyznačanyja da raźvićcia ŭ parku, — elektronika, bijamiedycyna, tonkaja chimija i mašynabudavańnie.

Miascovyja žychary i dačniki aktyŭna pratestujuć suprać budaŭnictva parku. Jany ŭpeŭnieny, što ad takoha maštabnaha prajekta, jaki praduhledžvaje stvareńnie sotniaŭ pradpryjemstvaŭ, niepaźbiežna pacierpić ekałohija hetych miescaŭ. Da taho ž ekołahi zajaŭlajuć, što industryjalnaja zabudova ŭ rekreacyjnaj zonie Minska surjozna pahoršyć ekałahičnaje stanovišča ŭ miehapolisie.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH