Julija Cimašenka abviaściła akcyju hramadzianskaha niepadparadkavańnia 2

Eks-premjer Ukrainy Julija Cimašenka, asudžanaja na 7 hadoŭ źniavoleńnia, abviaściła akcyju hramadzianskaha niepadparadkavańnia. Jana admaŭlajecca jechać u sud, kantaktavać sa śledčymi i viartacca ŭ pałatu ŭ znak hramadzianskaha niepadparadkavańnia.

«Kab źmienšyć u hramadstvie strach pierad vašym režymam, kab jašče raz skazać, što vy prynižajecie i razburajecie Ukrainu, ja abviaščaju svaju asabistuju akcyju hramadzianskaha niepadparadkavańnia. Mienavita takoje majo prava praduhledžana č.5 art.55 Kanstytucyi Ukrainy. Na siońnia heta adzinaje majo prava, jakim ja mahu zaraz skarystacca», — havorycca ŭ adkrytym liście eks-premjera da prezidenta Ukrainy Viktara Janukoviča, tekst jakoha apublikavaŭ abaronca Cimašenki Siarhiej Ułasienka.

Na dumku Cimašenki, Ukraina za čas prezidenctva Janukoviča amal straciła šaniec stać jeŭrapiejskaj dziaržavaj. Akramia taho, jana zajaŭlaje, što admaŭlajecca pryznavać prakuroraŭ i śledčych i nie maje namieru bolš ź imi mieć znosiny:

«Z hetaha momantu ja bolš nie pryznaju vašych prakuroraŭ i śledčych. Jany nie tyja, za kaho siabie vydajuć. Jany niesapraŭdnyja. Jany vašyja, Viktar Fiodaravič».

Eks-premjer zajaŭlaje taksama, što nie pryjedzie ŭ sud dobraachvotna, a kali jaje pasprabujuć dastavić prymusova, budzie baranicca: «Z hetaha momantu ja bolš ni razu nie pryjedu dobraachvotna ŭ vaš sud, bo heta ŭžo daŭno nie sud. Heta inkvizicyja biez spraviadlivaści i honaru dla 46 młn. hramadzian Ukrainy».

Eks-premjer taksama admaŭlajecca viartacca ŭ pałatu da taho času, pakul tam nie demantujuć videanazirańnie i nie vyviaduć vartu. «Z hetaha momantu ja bolš nie padparadkoŭvajusia ustanoŭlenym vami turemnym ździekam. Ja bolš ni razu nie dazvolu pravieści moj asabisty dahlad abo pieratrus maich rečaŭ. Ja budu fizična baranicca, niahledziačy na ​​chvarobu. Ja budu heta rabić tak, jak mahu».

gazeta.ua

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH