Lidar Abjadnanaj hramadzianskaj partyi Anatol Labiedźka aštrafavany na try bazavyja vieličyni sudom Savieckaha rajona Minska «za ŭdzieł u nie sankcyjanavanym Minharvykankamam vuličnym pikietavańni», u chodzie jakoha «razdavaŭ prachožym ulotki».
Jak raskazaŭ BiełaPAN palityk, adpaviednaje paviedamleńnie ab rašeńni suda, pryniatym 15 studzienia, jon atrymaŭ pa pošcie 22 studzienia. «Darečy, mianie samoha zabyli zaprasić na sudovaje pasiadžeńnie. Ja b nie admoviŭ sabie ŭ zadavalnieńni prysutničać na takim absurdnym pracesie, u chodzie jakoha ŭstanaŭlivajecca, što lubaja razdača infarmacyjnaha materyjału traplaje pad dziejańnie Kodeksa ab administracyjnych pravaparušeńniach», — skazaŭ jon.
Labiedźka paviedamiŭ, što pratakoł ab učynieńni administracyjnaha pravaparušeńnia taksama byŭ składzieny bieź jaho prysutnaści.«Infarmacyjnyja materyjały, u tym liku ab pazicyi partyi ŭ dačynieńni da dziaržaŭnaj pryvatyzacyi, razdavali 19 śniežnia kala Kamaroŭskaha rynku ŭ Minsku. Ni ja, ni inšyja aktyvisty AHP nie byli zatrymany, chacia nas i zdymaŭ na videakamieru čałaviek u cyvilnym. Tolki paźniej mnie prysłali faks ab nieabchodnaści źjavicca ŭ RAUS, ale ja taksama faksam paviedamiŭ, što nie zmahu heta zrabić pa chvarobie», — raskazaŭ jon.
U zdareńni Labiedźka bačyć peŭny pazityŭny momant.«Vidavočna, ułady nie žadajuć abmiarkoŭvać temu pryvatyzacyi publična, a tamu hatovy ažyćciaŭlać lubyja dziejańni, jakija pieraškadžajuć našym kantaktam ź ludźmi. Značyć, my pravilna vybrali kirunak svajoj pracy», — ličyć jon.
0
0
0
0
0
0
