U aŭtorak 4 vieraśnia ŭ rajonnych sudach Niaśvižu i Salihorsku pačnucca pracesy pa spravie niezarehistravanaha «Maładoha frontu». Na łavie padsudnych apynucca Nasta Azarka i Ivan Šyła.
Siamioch maładafrontaŭcaŭ užo sudzili pa artykule 193 KK «dziejnaść ad imia niezarehistravanaj arhanizacyi». Azarka z Šyłam stanuć vośmaj i dzieviatym. Na čarzie jašče Jarasłaŭ Hryščenia z Baranavič, data sudu jakoha pakul nie nazvanaja.
Pracesy pryznačanyja na adzin dzień z raźlikam na toje, kab na sudy pryjechała jak maha mieniej ludziej, miarkujuć maładafrontaŭcy. Tolki 4 vieraśnia ź bieraściejskaj turmy vyjdzie Pavał Sieviaryniec, jaki moh by arhanizavać naležnuju padtrymku pad ścienami sudoŭ Niaśvižu i Salihorsku. I, narešcie, 6 vieraśnia «Małady front» śviatkuje dziesiacihodździe. Prysudy maładzionam, takim čynam, mohuć stać svojeasablivym «vinšavańniem», ličać jany.
Nasta Azarka: Adna na ceły horad
 |
Imia 25‑hadovaj Nasty Azarki peryjadyčna fihuruje ŭ śpisach zatrymanych i ŭdzielnikaŭ apazycyjnych akcyjaŭ dosyć daŭno. Jana siadzieła na sutkach u 2004‑m, nieadnarazova atrymlivała štrafy, jaje zatrymlivali i trymali ŭ pastarunkach. Adnak žadańnie zajmacca hramadzkaj dziejnaściu nie źnikaje.
Paśla prezydenckich vybaraŭ‑2006 na Nastu ŭžo zavodzili kryminalnuju spravu pa tym samym artykule, ale ŭrešcie spynili. Sioleta vyrašyli zavieści znoŭ. U pastarunkach Azarka padpisvała raśpiski, što admaŭlajecca ad luboj palityčnaj dziejnaści, paśla milicyjanty łavili jaje znoŭ, kali jana vyviešvała niedzie ściah, ci raspaŭsiudžvała nalepki.
Nastaŭnica pačatkovych klasaŭ pavodle adukacyi, Nasta vymušanaja pracavać rabočaj na ilnozavodzie. I navat hetuju pracu dziaŭčyna znajšła tolki z dapamohaj pryjaznych milicyjantaŭ.
Na pracu ad kadebistaŭ pryjšła papiera, kab kantralavali ŭsie maje zajavy pa dniach, kali ja pišu zajavy na adhuły. Ja vielmi ŭdziačnaja maim kaleham za toje, što jany ni ab čym nie pytajucca. Maŭklivaja padtrymka.
Nasta adčuvaje ciapier mocnuju patrebu ŭ maralnaj padtrymcy.
Ivan Šyła: Junak z žaleznymi nervami
 |
Imiony bratoŭ Ivana i Illi Šyły zahučali paśla padziejaŭ na Płoščy. Tam jany byli razam z baćkam Uładzimieram. Tamu pytańnie baćkoŭskaj padtrymki ŭ ich siamji navat nie staić.
Za karotki termin Ivan Šyła (na fota) zmoh zhurtavać vakoł siabie niekalki dziasiatkaŭ chłopcaŭ i dziaŭčat, jakija składajuć kaściak salihorskaj apazycyi. Letaś u traŭni Ivan byŭ adnym z pačynalnikaŭ haładoŭki pratestu suprać ucisku moładzi ŭ navučalnych ustanovach.
«Chłopiec z kamiennym tvaram i žaleznymi nervami. Jon mała kaža, ale šmat robić. Jaho vytrymcy i metaskiravanaści moh by pazajzdrościć luby stały palityk», — charaktaryzuje Ivana Šyłu P.Sieviaryniec.
Šyłu ŭžo nia raz zatrymlivali, ale pakul nie sudzili, bo niepaŭnaletni, školnik. Zvyčajna chłopca, patrymaŭšy paru hadzinaŭ u pastarunku, adpuskajuć. Niekalki razoŭ na kvatery Šyłaŭ KDB ładziŭ pieratrusy z kanfiskacyjami. Letaś staršynia salihorskaha harvykankamu publična abia¬caŭ pasadzić Ivana ŭ kletku, kali jon nie supakoicca.
Šyła nia robić nijakich prahnozaŭ nakont sudu. Kaža, što ŭsio pakaža čas.
I Nasta, i Ivan prosiać usich nieabyjakavych padtrymać ich 4 vieraśnia.
