Ciapier admysłovyja kamisii chodziać pa siadzibach, šukajučy schavanych śviniej. Sialanie aburajucca i paraŭnoŭvajuć hetyja pošuki z časami nacysckaj akupacyi, kali taksama davodziłasia chavać žyŭnaść, kab paźbiehnuć rekvizycyj, paviedamlaje radyjo «Svaboda».
Zhodna z rašeńniem Biarozaŭskaha rajvykankamu sialanie musili likvidavać svaich śviniej, kali ich vioska za 5 kilametraŭ ci bližej ad śvinafermy. Ahułam na Biarozaŭščynie hetaje rašeńnie zakranuła 17 viosak.
Sialanie pratestavali, u vioskach Sialec i Kabaki navat źbiralisia stychijnyja mitynhi, dzie ŭładam vykazvali abureńnie. Skardzilisia ŭ abłvykankam i inšyja instancyi. Ale rašeńnie rajvykankamu zastałosia niaźmiennym. Śviniej daviałosia zabić.
Ciapier padvorki sialanaŭ ahladajuć admysłovyja kamisii z rajonnaj veterynarnaj słužby. Pad achovaj milicyjantaŭ jany šukajuć schavanych śviniej. Kali znojduć, haspadaram pahražaje administracyjnaja adkaznaść.
Kamentujuć žychary Kabakoŭ: «U nas vučycca syn u Pružanach, u nas małaja dačka ŭ škołu chodzić. Hrošaj u nas bolej niama. My nia źjeździli ni ŭ sanatoryi, ladoŭni pakuplaŭšy, ni na ramont hrošaj nie zastałosia, ni na što...»
«Pryjšli, abrabavali!.. Pahlańcie, jaki ŭ mianie chlaŭčuk, jak ja žyvu... Ja ŭdava, u mianie ŭnučak vučycca. Jon pryjdzie — u torbačku, baba, daj... A što ja dam?!»
«Mnie 80 hadoŭ, ja na svaim dvary haspadar. I ja nie liču patrebnym, kab chtości maimi śvińniami rasparadžaŭsia. Heta moj dvor! Pry niemcach u majho baćki zabrali karovu, a ja potym uziaŭ košyk jajek i zanios niemcu.
I jon tyja jajki zabraŭ i mnie karoŭku nazad viarnuŭ. A tut baču, što ŭžo śvinak nie addaduć... Zabirajuć i płaciać mnie pa 18 tysiač, a livernaja kaŭbasa — pa 19. Dažyć da takoha... Heta haniebnaja źjava. Chadzić pa chlavach, kab dać štrafu mnie».
Zabirajuć i płaciać mnie pa 18 tysiač, a livernaja kaŭbasa — pa 19. Dažyć da takoha...
Ludzi aburajucca tym bolš, što na dadzieny momant vypadkaŭ zachvorvańnia śviniej afrykanskaj čumoj u Biarozaŭskim rajonie nia vyjaŭlena.
Viaskoŭcy niezadavolenyja, što prafilaktyčnyja zachady suprać hetaj chvaroby tak žorstka adbivajucca na ichnim dabrabycie: «Skažycie, dzie ačah u nas jość, ad jakoha ja pavinien prybirać? Sam prezydent skazaŭ, na jakoj padstavie ja mušu prybirać svajo zdarovaje pahałoŭje?..»
U vyniku «śvinoj vajny» ŭčyniŭ demarš veterynar ź Biarozy Alaksandar Bahdančyk. Jon zvolniŭsia z rajonnaj veterynarnaj słužby na znak pratestu suprać žorstkaha źniščeńnia śviniej.
Admysłovyja ŭkoły, jakija pavinny zabivać śviniej, śmierci nie harantavali, tamu časta žyviolinu dabivali kuvałdaj. U interviju Svabodzie lekar raspaviadaŭ, što ličyć masavy zaboj śviniej na Biarozaŭščynie «nierazumnym».