Alaksandr Łukašenka raić moładzi nie šukać chutkich i lohkich hrošaj, a paśladoŭna damahacca ŭsiaho ŭłasnym rozumam i pracaj.
Ab hetym jon zajaviŭ siońnia, vystupajučy na maładziožnym forumie «Tradycyi. Moładź. Budučynia».
«Biełaruś, jakaja pieražyła, jak i ŭsie postsavieckija krainy, niaprosty i burny pieryjad stanaŭleńnia, vyjšła na stabilny šlach raźvićcia: chutkich, lohkich hrošaj nie budzie. Usiaho treba paśladoŭna damahacca ŭłasnym rozumam i pracaj. Nadychodzić era prafiesijanałaŭ va ŭsich śfierach — ad vytvorčaści i biznesu da śfier mastactva i industryi zabaŭ», — skazaŭ jon.
Łukašenka taksama padtrymaŭ ideju pra abviaščeńnie maładziožnaj budoŭlaj uźviadzieńnie Biełaruskaj AES.
Jon paabiacaŭ, što ŭ bližejšy čas na sustrečy z prezidentam Rasii Uładzimiram Pucinym jany razhledziać hetuju inicyjatyvu, bo BiełAES budzie ŭzvodzicca z udziełam rasijskich śpiecyjalistaŭ.
«My hetuju budoŭlu viadziem razam z brackaj Rasijaj. Abiacaju vam, što ŭ bližejšy čas my z prezidentam Pucinym razhledzim inicyjatyvu, kab hetuju budoŭlu, a moža być, i ŭźviadzieńnie nastupnaj atamnaj stancyi, jakuju Rasija budzie budavać u Kalininhradzie, zrabić našymi ahulnymi maładziožnymi budoŭlami. Heta budzie, napeŭna, pravilna», — skazaŭ jon.
Taksama Łukašenka zajaviŭ, što BRSM pavinien bolš nacelvać moładź na samarealizacyju ŭ rodnaj krainie, prapanavaŭ zrabić 2015 hod Hodam moładzi.
Łukašenka źviarnuŭ uvahu na toje, što 2015 budzie vyznačalnym u historyi krainy.
«Heta budzie vielmi niaprosty hod, ja heta kažu biez usialakaha padtekstu, — skazaŭ jon.
— Hety hod budzie vyznačać budučyniu našaj krainy pa mnohich-mnohich napramkach. I jak vy vyrašycie ŭ hety hod, chaj tak i budzie, heta budzie dla vas».
Łukašenka dadaŭ, što «našaj krainie para pierapynić sumnuju tradycyju minułaha stahodździa — razburać dazvańnia i kožnyja try dziesiacihodździ pačynać usio budavać z nula. I mienavita moładź pavinna skazać tut svajo słova, nazaŭždy pryščapiŭšy sabie imunitet da razburalnych radykalnych idejałohij».
