Heta samaje bujnoje miesca pachavańnia žycharoŭ abłasnoha centra, i tut znajšli apošni spačyn kolišnija pačynalniki demakratyčnaha ruchu ŭ Viciebsku: Siarhiej Ciarenćjeŭ, Aleś Mudryčenka, Alena Zaleskaja i Raman Sałaŭjan.
Inicyjatar tradycyi adviedvać na Dziady mohiłki adnadumcaŭ — Barys Chamajda. Hetyja štohadovyja pajezdki na mohiłki byvajuć niešmatlikija. Udzielniki jeduć hramadskim transpartam, biaruć z saboj kvietki, śviečki i pracoŭnyja pryłady, kab dobraŭparadkavać pachavańni.
Sioleta bieł-čyrvona-biełyja ściahi pieršymi załunali nad mahiłaj Aleny Zaleskaj, byłoj staršyni abłasnoj arhanizacyi Abjadnanaj hramadzianskaj partyi. Pad ściahami aktyvisty prybrali miesca pachavańnia, zapalili źničku dy ŭskłali kvietki. Zhadali, kolki daviałosia pieražyć hetaj užo niemaładoj tady spadaryni, kali jaje zatrymlivali za ŭdzieł u apazicyjnych akcyjach, jak ci nie ŭtraja maładziejšyja milicyjanty krucili joj ruki dy ŭpichvali ŭ mašyny, i jak hodna jana potym trymałasia na sudach...
Siarod prysutnych byŭ aktyvist Alaksandr Sałaŭjan, baćka pachavanaha na hetych mohiłkach Ramana Sałaŭjana. Hety chłopiec syšoŭ u lepšy śviet niečakana i trahična. Ale jaho časta zhadvajuć tyja, chto bačyŭ pikiety kala tak zvanaha «siniaha doma» ŭ Viciebsku. Raman Sałaŭjan kolki razoŭ vychodziŭ tudy razam z Barysam Chamajdam i Uładzimiram Pleščankam, taksama ŭžo niabožčykam.
Dahetul zhadvajuć u Viciebsku i Alesia Mudryčenku, adnaho z pieršych siabroŭ BNF. Siarhiej Ciarenćjeŭ taksama byŭ adnym ź pieršych viciebskich «frontaŭcaŭ». I žyćcio skłałasia tak, što dobraŭparadkavańnie jahonaj mahiły stała vyklučna kłopatam jaho siabroŭ. Štohod aktyvisty prynosiać kvietki.
Na kožnaj adviedanaj mahile zastałasia hareć źnička. Pa čarzie nad kožnaj łunali bieł-čyrvona-biełyja ściahi.
