grodnensis.by
U DTZ pad Iviancom (Vałožynski rajon) zahinuŭ 32-hadovy śviatar kaścioła Śviatoha Michaiła.
Avaryja adbyłasia ŭviečary 4 listapada a 19-j hadzinie na 30 kiłamietry trasy Ivianiec — Sivica — Biełakorac.
«U tym miescy, dzie adbyłasia avaryja, daroha rezka idzie na zakruhleńnie ŭprava. Kiroŭca pierad hetym ździajśniaŭ abhon i, chutčej za ŭsio, pieravysiŭ chutkaść. Jon nie spraviŭsia z kiravańniem i źjechaŭ u kiuviet. Tam aŭtamabil «Opiel» ŭdaryŭsia ŭ dreva. Ad atrymanych traŭmaŭ kiroŭca pamior na miescy. Zahinuŭšy byŭ śviatarom, miarkujecca, što jon jechaŭ sa słužby, bo byŭ apranuty ŭ ryzu», − raspavioŭ "Rehijanalnaj haziecie" inśpiektar dziažurna-patrulnaj słužby Vałožynskaj dziaržaŭtainśpiekcyi Andrej Bobryk.
Pa infarmacyi «Našaj Nivy», imia ksiandza Andrej Achrem. Jon naradziŭsia ŭ Vilejcy, tam ciapier žyvuć jahonyja baćki. Z 2005 pa 2012 prachodziŭ farmacyju i navuku pry ordenie ajcoŭ franciškanaŭ u Łodzi (Polšča). Sioleta Andreja Achrema vyśviacili ŭ ksiandzy. Svaju pieršuju słužbu jon adpraviŭ u vilejskim kaściole Uzvyšeńnia Śviatoha Kryža.
«Andrej byŭ paśviečany ŭ śviatary paŭhoda tamu. Jon słužyŭ u kaściole Sv. Michała Archanioła ŭ Iviancy. Učora Andrej viartaŭsia ź vioski Kamień, dzie zamianiaŭ śviatara susiedniaj parafii», — raskazaŭ pres-sakratar Kanfierencyi Katalickich Biskupaŭ u Biełarus Juryj Sańko.
Pachavańnie ksiandza Andreja Achrema adbudziecca ŭ piatnicu, 8 listapada, u kaściole Sv. Michała Archanioła ŭ Iviancy. Pačatak słužby a 13:00.
