22 listapada ŭ «Halerei Mastactva» (Minsk, pr-t Niezaležnaści, 12) adkryjecca vystava pracaŭ adnaho z samych jaskravych mastakoŭ Biełarusi Alesia Maračkina pad nazvaj «StART 60».
Drovy-1
Drovy-2
«Mastaki dy i nie tolki jany vielmi lubiać hulacca sa słovam «art», — kaža spadar Aleś. – Voś i ja vyrašyŭ nazvać tak vystavu, bo start majoj mastackaj karjery pryjšoŭsia na 60-yja hady, kali ja vučyŭsia ŭ Teatralna-mastackim. Karciny mienavita hetaha pieryjadu ja i budu vystaŭlać».
Pa słovach mastaka, tyja pracy vystaŭlajucca redka, a praź niekatoryja ź ich spadar Aleś mieŭ niepryjemnaści.
«Naprykład, karcina «Na lesapavale», jakaja taksama budzie vystaŭlacca, była napisana paśla taho, jak ja pračytaŭ «Archipiełah HUŁah» Sałžanicyna, — raskazvaje Maračkin. – Za jaje mianie ledź nie vyklučyli z VNU. Uvohule, tady nas vučyli pracavać u žanry sacyjalistyčnaha realizmu, a ja čaściakom samastojna pracavaŭ u inšych žanrach».
Zaraz karcina «Na lesapavale» znachodzicca ŭ ZŠA, u Muziei non-kanfarmizmu, adnak spadar Aleś stvaryŭ jaje kopiju, jakuju možna budzie ŭbačyć na vystavie.
«Aproč taho ja chaču vystavić i niekalki zusim novych prac, — kaža Maračkin.
— Naprykład, «Drovy-1 (miascovyja vuhlarody)» i «Drovy-2 (mutacyja)». Pieršaja karcina pakazvaje žyćcio biez nafty i hazu, dzie drovy vystupajuć u roli miascovaj krynicy enierhii. Druhaja častka pryśviečana sučasnamu hramadstvu, tym pracesam, jakija adbyvajucca ŭ śviecie, i za jakimi ludzi nie paśpiavajuć. Asabliva ŭ vioscy, ja sam bačyŭ pavalnaje pjanstva, adsutnaść narmalnaj čałaviečaj kamunikacyi. Karcina «Drovy-2» raskazvaje pra mutacyju viečnych kaštoŭnaściaŭ».
Usiaho na vystavie budziela 50 pracaŭ, i heta nie tolki karciny.
«Naprykład budzie praca pad nazvaj «Pryšelec», - raskazvaje Maračkin. – Heta vializny kamień z tajamničymi ŭzorami, taki sabie hość z kosmasu».
Adkryćcio vystavy «StART 60» adbudziecca 22 listapada a 17-j hadzinie.
