Alaksandr Łukašenka zapeŭnivaje, što situacyja na valutnym rynku krainy stabilizujecca i raić nasielnictvu nie biehać u abmiennyja punkty.
«Vy biehajecie pa abmieńnikach i čakajecie niejkaj devalvacyi. Prosta raju vam: nie rabicie hetaha i nie čakajcie (devalvacyi)», — zajaviŭ A. Łukašenka ŭ aŭtorak, razmaŭlajučy z rabotnikami AAT «Kieramin», paviedamlaje Interfaks.
Łukašenka adznačyŭ, što ŭłady pastavili pierad saboj «hałoŭnuju zadaču — nie dapuścić nijakich abvałaŭ».
«My bačym, što situacyja stabilizujecca. Tamu nie treba biehać», — skazaŭ jon.
Łukašenka ŭvosień niekalki razoŭ kranaŭ u svaich vystupach temu devalvacyi.
Tak, padčas «Dažynak» u Žłobinie 28 vieraśnia, jon skazaŭ, što temu devalvacyi razdźmijuć praź ŚMI «niahodniki śviadomyja, padahravajučy narod. (…) Kali, dapuścim, rezkaje padzieńnie — my padtrymlivajem svaju nacyjanalnuju valutu, rezkaja prapanova pa valucie — my skuplajem, Nacyjanalny bank. Byli takija pieryjady. Ale siońniašni dzień, kali ŭ cełym pa hodzie ŭziać, to my pakul, napeŭna, miljonaŭ na 150–200, ja dakładna nie pamiataju, nabyli bolš valuty, čym pradali. Ale ŭ apošnija miesiacy, ja hladžu, naš narodziec pabieh u abmiennyja punkty. Nu, biažycie. Biažycie!»
Padčas naviedvańnia BiełAZa 8 kastryčnika Łukašenka skazaŭ:
«Ale mianie što bolš za ŭsio chvaluje? Źjaviŭsia ŭ vas lišni biełaruski rubiel, kudy vy pabiehli? U abmieńniki skuplać valutu. I potym kryčać: a budzie devalvacyja ci nie budzie? Kali budzie devalvacyja — vy jaje zrobicie».
