U Homieli praciahvajecca słuchańnie kryminalnaj spravy ŭ dačynieńni da troch siabroŭ motakłuba «Načnyja vaŭki», u tym liku i lidara Paŭła Kanina, viadomaha ŭ horadzie i vobłaści čałavieka. Słuchańni ŭ sudzie Čyhunačnaha rajona Homiela raspačalisia jašče ŭ žniŭni.
Sprava była zaviedziena ŭ studzieni 2013 hoda pa art. 147 Kryminalnaha kodeksa — naniasieńnie ciažkich cialesnych paškodžańniaŭ. Paśla viečaryny na bazie kłuba «Načnyja vaŭki» žychar Homiela atrymaŭ paškodžańnie voka i straciŭ zrok.
Paciarpieły śćviardžaje, što jaho źbili haspadary kłuba — bajkiery. Tyja, u svaju čarhu, zajaŭlajuć, što nichto naviedvalnika nie biŭ, toj sam napiŭsia, skandaliŭ, padaŭ i niedzie takim čynam paškodziŭ voka.
Pa śviedčańniach paciarpiełaha, jaki pracuje achoŭnikam na pradpryjemstvie «Homieltransnafta «Družba», jon pryjšoŭ na viečarynu ŭ zakryty kłub bajkieraŭ sa svajoj žonkaj i jaje siabroŭkaj.
Trochi vypili. Zachaciełasia sfatahrafavacca dla historyi ŭ dzivosnych interjerach kłuba. Sapraŭdy, tam šmat roznych mudrahielistych fihurak z žaleza, ale fatahrafavać ich, pa praviłach kłuba, nielha.
Pryčym dla vykanańnia zdymkaŭ paciarpieły zalez na łaŭku sa zdymačom. Haspadaram kłuba heta nie spadabałasia, i jaho papiaredzili pra niedapuščalnaść takich pavodzinaŭ.
Pa słovach paciarpiełaha, bajkiery jaho źbili, i jon trapiŭ u lakarniu, dzie ŭ jaho dyjahnastavali razryŭ siatčatki voka.
Chto mienavita jaho biŭ — małady čałaviek nie pamiataje. Jak i nie pamiatajuć śviedki ź jaho boku (žonka i jaje siabroŭka), jakija, adnak, śćviardžajuć, što bačyli, jak ich spadarožnika bili try čałavieki.
Stračany zrok paciarpieły acaniŭ na 750 miljonaŭ rubloŭ — taki pamier kampiensacyi zajaviŭ jon u sudzie.
Tym časam abvinavačvanyja, usie troje, dajuć zusim inšyja pakazańni. Pa ich słovach, nichto naviedvalnika kłuba nie biŭ, naadvarot — jaho ŭvieś čas sprabavali supakoić.
«Jon skandaliŭ, svaryŭsia sa svajoj žonkaj, łajaŭsia, byŭ u krajniaj stupieni apjanieńnia, nie moh ustojać na nahach. Jaho ŭžo navat da stojki bara prychinuli, a jon usio padaŭ na asfaltavuju padłohu.
U nas u kłubie šmat žaleznych fihurak z vostrymi elemientami. Moža, na ich jon i ŭpaŭ. Jaho ledźvie źviali pa prystupkach na vulicu, dzie i pakinuli razam z žonkaj.
Jon i na vulicy padaŭ, na abledzianiełaj darozie», — davali śviedčańni ŭ sudzie abvinavačvanyja. Pa ich słovach, paciarpieły lez u bojku, machaŭ rukami.
Motakłub «Načnyja vaŭki» isnuje ŭžo 12 hadoŭ. Za hety čas u jaho siabroŭ nie było prablem z zakonam. Naadvarot — motakłub źjaŭlajecca aktyŭnym udzielnikam haradskich i abłasnych akcyj.
Na rachunku bajkieraŭ — udzieł u dabračynnych akcyjach, praca z padletkami, dapamoha dziciačamu domu, praviadzieńnie spabornictvaŭ pa motasporcie.
«Načnyja vaŭki» i asabista Pavieł Kanin majuć šmat padziak ad miascovych uładaŭ i DAI. U padtrymku bajkieraŭ vystupili arhanizacyi, ź jakimi «Načnyja vaŭki» pravodzili sumiesnyja akcyi: dziciačyja prytułki, centry techničnaj tvorčaści, vałanciory.
Na ŭsie sudovyja pasiadžeńni padtrymać «Načnych vaŭkoŭ» chodziać ich siabry i znajomyja, svajaki, pryjazdžali navat bajkiery ź Minska i Sankt-Pieciarburha.
Razhlad kryminalnaj spravy ŭ sudzie praciahvajecca. Bajkieram pahražaje pa art. 147 Kryminalnaha kodeksa da 15 hadoŭ pazbaŭleńnia voli.
