Namieśnik staršyni navukova-mietadyčnaj rady pry Ministerstvie kultury Ihar Čarniaŭski paviedamiŭ, što pašyreńnie darohi «Zasłaŭje -- Kałodziščy» ŭ rajonie ŭročyšča Kurapaty adbyvajecca biez uzhadnieńnia ź Ministerstvam kultury.
«My ciapier udakładniajem kiłamietraž, dzie viaducca raboty, tamu što była infarmacyja pra ŭčastak darohi kala pasiołka Soniečny, ale treba ŭdakładnić kankretna. Budziem dalej hladzieć, jak heta ŭrehulavać. I tut navat sprava nie ŭ tym, što raboty iduć biez uzhadnieńnia z navukova-mietadyčnaj radaj. Rada ŭzhadniaje prajektnuju dakumientacyju, jakaja moža pryvieści da źmieny historyka-kulturnaj kaštoŭnaści, a tut pačalisia ŭžo kankretnyja raboty ŭ zonie achovy historyka-kulturnaj kaštoŭnaści biez uzhadnieńnia i biez atrymańnia dazvołu Ministerstva kultury», — paviedamiŭ Ihar Čarniaŭski.
Pavodle Čarniaŭskaha, lubyja pracy na terytoryi administratyŭnych adzinak niajemohuć ažyćciaŭlacca biez dazvołu kiraŭnictva hetych administratyŭnych adzinak. Minski rajvykankam pavinien byŭ pryniać rašeńnie na raspracoŭku prajektnaj dakumientacyi, a zatym na vykanańnie rabot pavodle hetaj dakumientacyi. Hetaha zroblena nie było.
«Tym bolš, što Kurapaty — heta taki abjekt, jaki va ŭsich na słychu», — adznačyŭ spadar Čarniaŭski.
Aktyvist KCHP-BNF Aleś Makaŭ paviedamiŭ, što 300 mietraŭ pašyranaj darohi «Zasłaŭje -- Kałodziščy» kala Kurapataŭ hatovyja da ŭkładki asfaltu:
«Raboty pravodzić darožna-budaŭničaje ŭpraŭleńnie z Maładziečna. Zaraz adbyvajecca adsypka hraviju. Darohu pašyrajuć u bok Kurapataŭ. Spačatku była infarmacyja, što pašyreńnie budzie ŭ advarotny ad uročyšča bok, ale zaraz vyśvietliłasia, što nasuprać prachodzić niejki siłavy kabiel, tamu pašyrajuć u bok Kurapataŭ. Zaraz užo na praciahu bolš jak 300 mietraŭ układzieny i razraŭniany hravij. Asfalt pakul nie kłali, ale 300 mietraŭ padrychtavana dla ŭkładki asfaltu».
