Ministerstva achovy zdaroŭja Biełarusi abvierhła infarmacyju pra abmiežavańnie impartu lekavych srodkaŭ.
Raniej niekatoryja internet-resursy raźmiaścili infarmacyju pra toje, što Ministerstva achovy zdaroŭja rekamiendavała subjektam farmaceŭtyčnaha rynku admovicca ad impartu zamiežnych preparataŭ, jakija majuć biełaruskija anałahi, i ŭ śniežni budzie zabaronienaje mytnaje afarmleńnie takich lekaŭ.
Jak patłumačyli ŭ ministerstvie, paradak uvozu lekavych srodkaŭ vyznačajecca zakonam «Ab lekavych srodkach», zhodna ź jakim «zabaraniajecca ŭvoz niajakasnych lekavych srodkaŭ, falsifikavanych lekavych srodkaŭ, a taksama lekavych srodkaŭ z zakončanym terminam pryhodnaści».
U viedamstvie adznačyli, što na farmaceŭtyčnym rynku mohuć znachodzicca ŭsie zarehistravanyja lekavyja srodki — jak biełaruskija, tak i zamiežnyja, i padčas rehistracyi lekaŭ da ŭsich vytvorcaŭ majucca adzinyja patrabavańni, vyznačanyja standartami Jeŭrapiejskaj farmakapiei. Ciapier u dziaržaŭnym rejestry zarehistravana kala 6 tys. lekavych srodkaŭ, ź jakich bolš čym 1,2 tys. — ajčynnaj vytvorčaści.
U toj ža čas Ministerstva achovy zdaroŭja padkreśliła, što ŭ Biełarusi raspracavanaja halinovaja prahrama impartazamiaščeńnia lekavych srodkaŭ.
«Lekavaje zabieśpiačeńnie źjaŭlajecca najvažniejšym składnikam sistemy achovy zdaroŭja, pryjarytety dziaržaŭnaj palityki ŭ halinie farmaceŭtyčnaj pramysłovaści dazvalajuć zabiaśpiečvać cenavuju dastupnaść lekavych srodkaŭ i stvarać umovy dla raźvićcia farmaceŭtyčnaha rynku», — havorycca ŭ paviedamleńni.
«Patrabavańniem siońniašniaha dnia źjaŭlajecca pašyreńnie asartymientu ajčynnych kankurentazdolnych lekavych srodkaŭ i vyviadzieńnie na rynak novych raspracovak», — adznačyli ŭ viedamstvie. Pry hetym u krainie «stvorana efiektyŭnaja sistema kantrolu za abaračeńniem lekavych srodkaŭ, jakuju vysoka aceńvajuć u tym liku mižnarodnyja ekśpierty».
