Kali my spadziajemsia na pieramieny ŭ Rasii, to spačatku treba dačakacca doŭhaterminovaha padzieńnia koštaŭ na naftu.
Radasłaŭ Sikorski. Fota K.Čachovskio, DELFI
Takuju pazicyju ŭ Vilni vykazaŭ ministr zamiežnych spraŭ Polščy Radasłaŭ Sikorski, paviedamlaje partał ru.delfi.lt.
Sikorski nie chavaje, što źviazvaje viražy Rasii ŭ źniešniaj palitycy sa žmieńkaj aliharchaŭ, jakija kirujuć tracinaj usiaho vializnaha bahaćcia krainy.
«Rasija vałodaje inšaj sacyjapalityčnaj madellu, na dadzieny momant stabilnaj. Adzin pakazčyk, dumaju, heta ilustruje. 35 % rasijskich bahaćciaŭ naležać 110 indyvidam», — skazaŭ Sikorski na kanfierencyi «Acenka Uschodniaha partniorstva: vykliki i paradak dnia hramadzianskaj supolnaści».
Pavodle jaho słoŭ, šarahovyja žychary Rasii sa stała aliharchaŭ pakul atrymlivajuć dastatkova drabkoŭ. Nibyta situacyja źmianiłasia b tolki tady, kali b nadoŭha i značna patańnieła nafta.
«Pakul cana na naftu składaje bolš za 100 dalaraŭ za barel, heta (ład u Rasii — DELFI) moža padtrymlivacca. Pakolki dosyć traplaje i da prostych rasiejcaŭ. ( … )
U Rasii surjoznyja reformy pačnucca, być moža, tolki tady, kali košt na naftu ŭpadzie nižej za 100 dalaraŭ chacia b na niekalki hadoŭ», — prahnazavaŭ Sikorski.
Łohika Janukoviča: ekanomiku vyratuje kraina, jakaja niadaŭna jaje karała
Raźvivajučy temu Ukrainy, Sikorski škadavaŭ u suviazi z rašeńniem Kijeva nie padpisvać asacyjatyŭnaje pahadnieńnie ź ES. Jon taksama adznačyŭ, što sproby kiraŭnictva Ukrainy łaviravać pamiž Uschodam i Zachadam z metaj atrymańnia najbolš vyhadnaha varyjantu, ES nie cikaviać.
«Bajusia, što Ukraina ŭstała na pramy šlach pazbaŭleńnia jašče adnoj mahčymaści. Prezident Viktar Janukovič viadomy nam, jak abrany demakratyčnym šlacham prezident Ukrainy. (…)
Adnak hety svojeasablivy aŭkcyjon tak prosta nie spracuje. My ŭ hetaj hulni nie ŭdzielničajem», — praciahnuŭ Sikorski. Pavodle jaho słoŭ, niekalki dziesiacihodździaŭ tamu palaki bačyli Ukrainu jak bolš bahatuju krainu ź vialikimi mahčymaściami.
Adnak u niejki momant niešta paviarnułasia nie ŭ tym napramku. Adna z pryčyn, na dumku palityka — niežadańnie zmahacca z karupcyjaj. «Ni vy, ni my nie možam prymusić elitu Ukrainy pačać ačyščeńnie, zmahacca z karupcyjaj.
Heta možna zrabić. I paraŭnalna chutka. Stvaraješ rejestr intaresaŭ, prymušaješ palitykaŭ publikavać dekłaracyi majomaści. I karaješ ich u vypadku padmanu. Hetaha dastatkova. 3-5 hadoŭ, kali dastatkova ludziej zasudziać — dyk druhija zasvojać i pierastanuć kraści», — pradstaviŭ Sikorski svoj recept.
Viadoma ž, u kantekście Ukrainy havorka išła i ab Rasii. Sikorski nie chavaŭ ździŭleńnia ŭ suviazi z tym, što byŭ abrany varyjant Rasii, a nie ES. «Ukraina spadziajecca na ekanamičnyja rašeńni ad krainy, jakaja tolki što ŭžyvała ŭ dačynieńni da jaje handlovyja sankcyi. Ale ja žadaju ŭdačy», — iranizavaŭ Sikorski.
Dyjałoh z Rasijaj. Kaža tolki adzin bok?
Miž tym ministr zamiežnych spraŭ Šviecyi Karł Bilt adznačyŭ, što Rasija — taja kraina, ź jakoj ES na dypłamatyčnym froncie pracuje najbolš aktyŭna.
Karł Bilt.Fota K.Čachovskio, DELFI
Adnak Maskva nibyta sama demanstruje niežadańnie puskacca ŭ bolš hłyboki dyjałoh. «Niekatoryja kažuć, što my padtrymlivajem niedastatkovy dyjałoh z Rasijaj.
Z Rasijaj ES padtrymlivaje bolš aktyŭny dyjałoh, čym z kim-niebudź inšym. (…) Abjom dyjałohu z Rasijaj bolšy, čym ź lubymi inšymi krainami. A kali my padychodzim da źmiestu (dyjałohu — DELFI), karcina inšaja. (…)
Zaraz rasiejcy kažuć: my nie chočam tak chutka, nie možam, nie hatovyja. Jany — toj bok, jaki mienš choča supracoŭničać. My b chacieli bolš pracavać z Rasijaj», — skazaŭ Bilt.
Rasija spała. Ale pračnułasia svoječasova
Inšy ŭdzielnik dyskusii, dyrektar źniešniaj palityki brytanskaha Centra jeŭrapiejskich reform Jan Bond adznačyŭ, što Rasija pa-svojmu «praspała» prahramu Uschodniaha partniorstva i sa spaźnieńniem adreahavała na sproby ES prabracca ŭ zonu ŭpłyvu Kramla.
Jan Bond. Fota K.Čachovskio, DELFI
Adnak, pračnuŭšysia, Maskva raspačała jasnyja i vielmi aktyŭnyja dziejańni. «U peŭnym sensie, dumaju, Rasija pavolna pračynałasia. (…) Ale kali rasiejcy pračnulisia, im nie spadabałasia ŭbačanaje», — kanstatavaŭ Bond.
Na jaho dumku, treba padtrymlivać dyjałoh z Rasijaj. Adnak u śvietapohladach ES i Rasii jość istotnaja roźnica. «My ŭ pieršuju čarhu vierym u suvierennaść susiedziaŭ.
Pa-druhoje — vierym, što nam na karyść stabilnyja, kvitniejučyja i demakratyčnyja susiedzi. I mnie ŭsio bolš zrazumieła, što Rasija nie vieryć u poŭnuju suvierennaść svaich susiedziaŭ. Jana vieryć u abmiežavanuju suvierennaść svaich susiedziaŭ.
Druhoje, jana bačyć padabienstva, kali jość choć niejki ŭzrovień niestabilnaści i niedachopu demakratyi. Heta dazvalaje tuzać za matuzki ŭnutry hetych krain», — skazaŭ śpiecyjalist.
