Razhlad spravy byłoha palitźniavolenaha Vasila Parfiankova, jakoha abvinavačvajuć na padstavie art. 421 Kryminalnaha kodeksa Biełarusi (nievykanańnie patrabavańniaŭ previentyŭnaha nahladu), praciahniecca 5 śniežnia ŭ sudzie Pieršamajskaha rajona Minska.
Sudździa Leanid Jarmolenkaŭ 28 listapada byŭ vymušany pieranieści pasiadžeńnie, tamu što Parfiankovu va ŭstanoŭlenym paradku nie była ŭručana pastanova ab pryznačeńni na siońnia sudovaha pasiadžeńnia. Adpaviedny dakumient były palitźniavoleny pavinien być atrymać za piać dzion da suda, adnak jamu paviedamili pra datu pasiadžeńnia tolki ŭčora.
Jak zajaviŭ žurnalistam pierad pracesam Parfiankoŭ, jakoha pryvieźli ŭ sud pad kanvojem, bo jon znachodzicca ŭ lačebna-pracoŭnym prafiłaktoryi (ŁPP) № 1 u Śvietłahorsku (Homielskaja vobłaść), jon hatovy da taho, što zhodna z rašeńniem suda moža znoŭ apynucca ŭ turmie.
Vasil Parfiankoŭ i jašče adzin były palitźniavoleny, Uładzimir Jaromienak, byli asudžany 16 vieraśnia na piać sutak aryštu za parušeńnie praviłaŭ previentyŭnaha nahladu (art. 24.12 Kodeksa ab administracyjnych pravaparušeńniach) i źmieščany ŭ CIP. Abodva pavinny byli vyzvalicca 21 vieraśnia, adnak ź CIP vyjšaŭ tolki Jaromienak — Parfiankova źmiaścili na hod u ŁPP.
U 2011 hodzie Parfiankoŭ byŭ asudžany ŭ miežach kryminalnaj spravy ab masavych biesparadkach u Minsku 19 śniežnia 2010 hoda. Jaho pryhavaryli da čatyroch hadoŭ pazbaŭleńnia voli ŭ kałonii strohaha režymu, ale ŭ žniŭni taho ž hoda asudžany vyjšaŭ na volu na padstavie ŭkaza prezidenta ab pamiłavańni.
Ciapierašni pieraśled byłoha palitźniavolenaha pravaabaroncy razhladajuć jak pomstu ŭładaŭ i sprobu nacisku na hramadskich aktyvistaŭ.
