Pra zarpłatu daktaroŭ i nieabchodnaść kłapacicca pra svajo zdaroŭje i płacić za naviedvańnie palikliniki razvažaŭ u efiry prahramy «Kontury» telekanała ANT viečaram 2 lutaha deputat pałaty pradstaŭnikoŭ, člen pastajannaj kamisii pa achovie zdaroŭja, fizičnaj kultury, siamiejnaj i maładziožnaj palitycy, staršynia HA «Biełaruskaja asacyjacyja daktaroŭ» Dźmitryj Šaŭcoŭ.
Pavodle jaho słoŭ, hałoŭnaja prablema — heta vysokaja nahruzka, ź jakoj doktar sutykajecca štodnia. «Viadoma, jaje treba narmavać. I tady sama pa sabie prablema budzie častkova vyrašana», — ličyć deputat.
Nakont vykazvańniaŭ vice-premjera Anatola Tozika ab tym, što hramadzianie pavinny brać udzieł u apłacie svajho lačeńnia, deputat Šaŭcoŭ adznačyŭ: «My niapravilna tłumačym frazu «biaspłatnaja miedycyna». Jana nie byvaje biaspłatnaj. Jana biaspłatnaja dla nas z vami, ale dla dziaržavy heta kaštuje kałasalnych hrošaj. I časam my marnatraŭna stavimsia da ŭłasnaha zdaroŭja i pa-spažyviecku stavimsia da sistemy achovy zdaroŭja. Heta niedapuščalna. Čałaviek nie pavinien davodzić siabie da situacyi, kali jon stanovicca žycharom palikliniki».
Na žal, pavodle słoŭ Šaŭcova, u kožnaj paliklinicy znojdziecca dosyć vialikaja kolkaść ludziej, jakija prychodziać siudy bolš za sto razoŭ u hod. «Prosta jany tak chočuć. Jany chočuć pryjści pamierać cisk zamiest taho, kab kupić tanomietr, prosta spytać, prosta pačytać, interpretavać analizy, pierapytać, što doktar skazaŭ na minułym pryjomie. Heta vylivajecca ŭ dosyć surjoznuju nahruzku.
Što robicca ŭ kabiniecie va ŭrača? Siadziać urač, miedsiastra, pacyjent i jašče tam ža jak minimum dva čałavieki «prosta spytać». Takoha być nie pavinna.
Biezumoŭna, heta vylivajecca ŭ razdražnialnaść i pacyjenta, i ŭrača, vysokuju nahruzku, tamu što ŭrač nie moža zasiarodzicca na adnoj prablemie, pastavić dakładny dyjahnaz. Heta havoryć i pra adsutnaść kultury, pavahi da lekara», — kanstatavaŭ śpiecyjalist.
Pacyjent, upeŭnieny Šaŭcoŭ, pavinien być zacikaŭleny ŭ zachavańni ŭłasnaha zdaroŭja: «Kali jon atrymlivaje miedycynskuju dapamohu biaspłatna, to jon marnatraŭna i stavicca da hetych rečaŭ. Kali pacyjent budzie chacia b simvalična płacić, jon užo budzie ŭdzielnikam u zachavańni ŭłasnaha zdaroŭja, partnioram», — miarkuje deputat.
Parłamientaryi, pavodle jaho słoŭ, hatovyja da ŭniasieńnia adpaviednych papravak u zakanadaŭstva, kali patrebnaść u hetym uźniknie.
