Na sustrečy kiraŭnictva AAT «Urałkalij» i «Biełaruskaja kalijnaja kampanija» (BKK) u minułuju piatnicu ŭ Maskvie havorka pra adnaŭleńnie partniorstva nie išła.
Pra heta piša siońnia rasijskaje vydańnie «Kammiersant'» sa spasyłkaj na krynicy, znajomyja z chodam pieramoŭ.Kiraŭniki «Urałkalija» i AAT «Biełaruskaja kalijnaja kampanija» (BKK, trejdar «Biełaruśkalija») upieršyniu za paŭhoda praviali asabistuju sustreču. Ale, pavodle źviestak «'», pra adnaŭleńnie partniorstva havorka nie išła.
Jak raniej paviedamlałasia, pieramovy hienieralnych dyrektaraŭ BKK Aleny Kudraviec i «Urałkalija» Dźmitryja Osipava adbylisia 31 studzienia.
Heta była pieršaja sustreča na takim uzroŭni z momantu spynieńnia ŭ kancy lipienia 2013 hoda sumiesnych prodažaŭ «Urałkalija» i «Biełaruśkalija» na suśvietnym rynku praź ich sumiesnaje pradpryjemstva ZAT «Biełaruskaja kalijnaja kampanija».
Pavodle infarmacyi pres-sakratara BKK Iryny Saŭčanki, baki abmierkavali «biahučyja pytańni, źviazanyja ź dziejnaściu Biełaruskaj kalijnaj kampanii, akcyjanieram jakoj usio jašče źjaŭlajecca «Urałkalij». «Abmiarkoŭvalisia zusim radavyja pytańni haspadarčaha tołku. Nakolki ja viedaju, nijakich pieramoŭ, źviazanych z rynkam, nie pravodziłasia», — zajaviła Saŭčanka, adznačyŭšy, što nie viedaje, pa čyjoj inicyjatyvie adbyłasia sustreča.
U pres-słužbie «Urałkalija» kamientavać sustreču admovilisia.
Tym časam, pavodle źviestak «Kommiersanta», Kudraviec i Osipaŭ abmiarkoŭvali «mahčymy vychad «Urałkalija» z kapitału ZAT «BKK», jakoje nie pracuje,— da žniŭnia 2013 hoda sumiesnaha trejdara kampanij». «Niahledziačy na źmienu akcyjanieraŭ «Urałkalija» i zatuchańnie kanfliktu, pracavać pa starych damoŭlenaściach baki nie źbirajucca», — piša rasijskaje vydańnie.
Pavodle danych krynic «Kommiersanta», baki abmierkavali roznyja varyjanty vychadu «Urałkalija» z ZAT «BKK», u jakim rasijskaj kampanii ciapier naležyć 50%, ale «rašeńniaŭ pryniata nie było».
Akcyjanierami ZAT «BKK», akramia «Urałkalija», źjaŭlajucca «Biełaruśkalij» (45%) i Biełaruskaja čyhunka (5%). Da siaredziny 2013 hoda heta SP zajmała kala 43% suśvietnaha rynku kaliju. U kancy lipienia «Urałkalij» abviaściŭ pra pačatak samastojnaha trejdynhu. Siońnia «Urałkalij» handluje praz svajho trejdara, kampaniju Uralkali Trading, a «Biełaruśkalij» — praz ułasnaje AAT «BKK», stvoranaje vosieńniu 2013 hoda.
Krynicy «Kommiersanta» śćviardžajuć, što pra adnaŭleńnie supracoŭnictva «Urałkalija» i «Biełaruśkalija» ŭ miežach ZAT «BKK» havorki nie idzie. «Kali kampanii i zmohuć pracavać znoŭ razam, to heta budzie zroblena ŭ miežach novaha trejdara i ź inšym raźmierkavańniem dolaŭ u im»,— zajaviŭ adzin z surazmoŭcaŭ vydańnia. Heta źviazana z tym, što, niahledziačy na roźnicu ŭ abjomach vytvorčaści (10,5 młn. ton «Urałkalija» ŭ 2013 hodzie suprać 5,7 młn. ton «Biełaruśkalija»), pradukcyja bakoŭ pradavałasia parytetna.
Nahadajem, 5 vieraśnia 2013 hoda Alaksandr Łukašenka padpisaŭ ukaz № 399 «Ab udaskanaleńni ekspartu kalijnych uhnajeńniaŭ», u adpaviednaści ź jakim stvorana novaja handlovaja kampanija — AAT «Biełaruskaja kalijnaja kampanija». Na novuju kampaniju ŭskładzieny zadačy, jakija da hetaha vykonvała ZAT «BKK», — prodaž kalijnych uhnajeńniaŭ.
Ukaz byŭ padpisany nieŭzabavie paśla taho, jak u dačynieńni da hrupy supracoŭnikaŭ staroj kampanii — ZAT «BKK» — u Biełarusi raspačali kryminalnuju spravu, a staršynia nahladalnaha savieta ZAT hiendyrektar AAT «Urałkalij» Uładzisłaŭ Baŭmhiertnier byŭ aryštavany ŭ Minsku. Mieniedžary ZAT «BKK» padazrajucca va złoŭžyvańni ŭładaj i słužbovymi paŭnamoctvami, a taksama ŭ kradziažy.
25 listapada 2013 hoda pieršy namieśnik hiendyrektara BKK Alaksandr Palakoŭ, adkazvajučy na pytańnie pra mahčymaje adnaŭleńnie supracoŭnictva BKK z «Urałkalijem», zajaviŭ: «Dla rynku najaŭnaść damoŭlenaści pamiž biełaruskim i rasijskim bokam — pazityŭnaja, hetaha navat čakajuć. My hatovy da hetaha, nie zakryty».
