Temu efiektyŭnaści ekanomiki, jak u cełym, tak i kožnaha, zaniataha ŭ joj, zakranuŭ prem`ier-ministr Michaił Miaśnikovič 5 lutaha, uručajučy pa daručeńni prezidenta dziaržuznaharody zasłužanym ludziam Biełarusi. Pra heta paviedamlaje pres-słužba ŭrada.
«Ź niapoŭnych 10 młn. (nasielnictva krainy) u śfiery materyjalnaj vytvorčaści siońnia pracujuć krychu bolš za 2,5 młn., krychu bolš za 2 młn. hramadzian zaniatyja ŭ sacyjalnaj śfiery, kala 2,5 młn. — heta piensijaniery i prykładna stolki ž — navučency i moładź. Takim čynam, nam davodzicca ličyć kožnuju kapiejku. Hałoŭnaje, kab biudžetnyja srodki efiektyŭna vykarystoŭvalisia. Na kožnym pracoŭnym miescy, u kožnaj arhanizacyi my pavinny vielmi aščadna tracić usie srodki, — padkreśliŭ Miaśnikovič. — Nie maje značeńnia, heta srodki biudžetu ci haspadarčaha sub`iekta — heta našy biełaruskija srodki, naša bahaćcie».
Źviarnuŭ uvahu prem`ier-ministr i na farmiravańnie zarabotnaj płaty. Pazicyja ŭrada zaklučajecca ŭ tym, što zarabotnaja płata pavinna być zaroblena.
«My nikoli nie stavim zadaču dasiahnuć niejkaha kankretnaha pakazčyka ŭzroŭniu zarabotnaj płaty — treba hladzieć na jaje pakupnickuju zdolnaść. A kali pahladzieć na parytetnaść (heta značyć kolki za našu zarpłatu možna kupić tavaraŭ i pasłuh), to atrymlivajecca, što my žyviem zusim nie horš, čym u Rasijskaj Fiederacyi, navat krychu lepš, čym va Ukrainie. Dla krain Uschodniaj Jeŭropy my majem siaredni pakazčyk».
U śpisie ŭznaharodžanych 67 čałaviek. Heta rabotniki pramysłovaha kompleksu, achovy zdaroŭja, mytnych orhanaŭ, adukacyi, navuki i kultury. Jany ŭdastojeny ŭznaharod za šmathadovuju plonnuju pracu, uzornaje vykanańnie słužbovych abaviazkaŭ i vysokaje prafiesijnaje majsterstva, dasiahnieńnie vysokich vytvorčych pakazčykaŭ u śfiery mašynabudavańnia i lohkaj pramysłovaści, udaskanaleńnie padatkovaj sistemy i realizacyju dziaržaŭnaj infarmacyjnaj palityki, vialiki asabisty ŭniosak u raźvićcio srodkaŭ suviazi, śfiery adukacyi, kultury, mastactva i sportu.
Niahledziačy na toje što siarod uznaharodžanych siońnia pradstaŭniki roznych śfier ekanomiki, ich praca, pavodle słoŭ prem`ier-ministra, adnolkava važnaja, bo ŭsie jany pracujuć na karyść ahulnaj spravy. «Naša nacyja mocnaja tady, kali jana ab`iadnanaja. I ŭ nas heta atrymlivajecca», — kanstatavaŭ Miaśnikovič. Jon taksama dadaŭ: «My i dalej, vykonvajučy volu kiraŭnika dziaržavy, urada, budziem rabić usio dla taho, kab padtrymać i tych, chto pracuje ŭ śfiery materyjalnaj vytvorčaści, i tych, chto zaniaty tvorčaściu».
