Raspačata kryminalnaja sprava pa fakcie naniasieńnia ŭronu dziaržavie pry madernizacyi AAT «Viciebskdreŭ», paviedamiŭ žurnalistam 7 lutaha ŭ Minsku hienieralny prakuror Biełarusi Alaksandr Kaniuk.
Pavodle jaho słoŭ, u miežach rasśledavańnia buduć ustanoŭleny vinavatyja i vyznačana suma naniesienaha ŭronu, a taksama vyśvietlena pryčyna, pa jakoj pradpryjemstva nie było ŭviedziena ŭ stroj va ŭstanoŭlenyja terminy.
Ciapier u miežach hetaj kryminalnaj spravy pravodzicca prakurorskaja pravierka, skazaŭ Kaniuk.
Jon zajaviŭ, što Hienprakuratura siońnia maje namier nadavać pavyšanuju ŭvahu pytańniam racyjanalnaha vykarystańnia biudžetnych srodkaŭ u krainie, a taksama baraćbie ź biezhaspadarlivaściu.
Pry hetym hienprakuror paabiacaŭ, što «nijakaha palavańnia na viedźmaŭ nie budzie».
31 studzienia Alaksandr Łukašenka pravioŭ naradu ab stanie i pierśpiektyvach raźvićcia arhanizacyj kancerna «Biellespapierapram». Jon rezka raskrytykavaŭ čynoŭnikaŭ za zryŭ terminaŭ madernizacyi «Viciebskdreva» i zapatrabavaŭ praanalizavać uron u miežach kryminalnaj spravy.
Źviartajučysia da kiraŭnika Administracyi prezidenta Andreja Kabiakova, Łukašenka daručyŭ: «Zaprasicie hienieralnaha prakurora i daručycie ŭ miežach kryminalnaj spravy razhledzieć usie pytańni i paličyć straty. Sa mnoj uzhadniać nie treba. Kali treba za kimści sačyć apieratyŭna, sadžać u śledčy izalatar — sadžajcie».