U kožnym vialikim jeŭrapiejskim horadzie isnuje staraja častka, jakaja źjaŭlajecca centram kulturnaha i turystyčnaha žyćcia. Jana całkam abo častkova zakrytaja dla hramadskaha i asabistaha transpartu.
U mai 2012 hoda piešachodnaja zona była ŭpieršyniu adkryta i ŭ Minsku. Jana zajmała častku vulicy Karła Marksa.
Z maja da vieraśnia na piešachodnaj zonie (praŭda, tolki na vychodnych) vystupali muzykanty, tancory, akrabaty i fokuśniki.
U hrupie «Minsk. Karła Marksa» na sajcie Ukantakcie.ru pačałosia płanavańnie novaha siezonu. Niekatoryja muzyčnyja hurty ŭžo abviaścili pra žadańnie vystupić u peŭnyja dni.
Ale sioleta ŭłada vyrašyła admovicca ad arhanizacyi piešachodnaj zony na Marksa.
Pra heta ahienctvu «Minsk-Naviny» paviedamiła Vitalina Rudzikava, pieršaja namieśnica načalnika hałoŭnaha ŭpraŭleńnia ideałahičnaj pracy, kultury i pa spravach moładzi Minharvykankama.
Možna mierkavać, što na takoje rašeńnie paŭpłyvali dźvie akaličnaści. Pa-pieršaje, skarhi žycharoŭ vulicy Karła Marksa, jakim nieadnarazova pieraškadžaŭ šum ad vystupleńniaŭ. Pa-druhoje, čempijanat śvietu pa chakieju.
Płanujecca, što zaŭziatary buduć adpačyvać na terytoryi Vierchniaha horada, jakaja sioleta abjaŭleny zonaj haścinnaści. Mienavita na placoŭcy pierad haradskoj ratušaj, a taksama na prylehłych vulicach adbuducca imprezy, papiarednie zapłanavanyja na Karła Marksa.