Inicyjavanaje Ukrainaj niečarhovaje pasiadžeńnie Savieta ministraŭ zamiežnych spraŭ (SMZS) SND u Kijevie 12 sakavika nie adbudziecca. Takoje rašeńnie pryniata siońnia ŭ Minsku pa vynikach pasiadžeńnia Savieta pastajannych paŭnamocnych pradstaŭnikoŭ dziaržaŭ SND pry statutnych i inšych orhanach Sadružnaści. Ukrainski bok rasceńvaje heta jak «faktyčnaje samaŭchileńnie SND ad vyrašeńnia i navat abmierkavańnia situacyi va Ukrainie i ŭ Aŭtanomnaj Respublicy Krym».Pasiadžeńnie prachodziła ŭ Vykankamie SND u zakrytym farmacie. Jak paviedamiła pastajannaje pradstaŭnictva Ukrainy pry kaardynacyjnych instytutach SND, u im uziali ŭdzieł pastajannyja pradstaŭniki ŭsich krain Sadružnaści aprača Turkmienistana i Uźbiekistana, a taksama kiraŭnictva Vykankama SND. Na paradku dnia sustrečy było tolki adno pytańnie — «Ab terminach praviadzieńnia i materyjałach paradku dnia inicyjavanaha Ukrainaj niečarhovaha pasiadžeńnia Savieta ministraŭ zamiežnych spraŭ SND».
«Padčas pasiadžeńnia pastajannyja pradstaŭniki bolšaści dziaržaŭ — udzielnic SND abviaścili pazicyju svaich dziaržaŭ, jakaja zaklučajecca ŭ tym, što praviadzieńnie niečarhovaha pasiadžeńnia SMZS u Kijevie 12 sakavika h.h. nie ŭjaŭlajecca mahčymym u suviazi ź nieabchodnaściu dapracoŭki prapanavanaha dla razhladu pytańnia, što tyčycca najaŭnaj situacyi ŭ asobnych rehijonach Ukrainy, u pryvatnaści ŭ Aŭtanomnaj Respublicy Krym, i pryniaćci adpaviednaj zajavy SMZS», — havorycca ŭ paviedamleńni ŭkrainskaha pastajannaha pradstaŭnictva.
«Z-za adsutnaści zhody dziaržaŭ — udzielnic SND na praviadzieńnie inicyjavanaha Ukrainaj niečarhovaha pasiadžeńnia Savieta ministraŭ zamiežnych spraŭ SND 12 sakavika 2014 hoda ŭ horadzie Kijevie, abmierkavańnie pradstaŭlenych Ukrainaj materyjałaŭ da zhadanaha pasiadžeńnia nie ŭjaŭlajecca mahčymym», — paviedamlaje pastajannaje pradstaŭnictva.
Pry hetym u paviedamleńni padkreślivajecca, što Ukraina, jak dziaržava, jakaja staršynstvuje ŭ SND u 2014 hodzie, «u adpaviednaści ź dziejnymi praviłami pracedury Savieta kiraŭnikoŭ dziaržaŭ, Savieta kiraŭnikoŭ uradaŭ, Savieta ministraŭ zamiežnych spraŭ i Ekanamičnaha savieta SND, maje poŭnaje prava sklikać niečarhovaje pasiadžeńnie SMZS».
«Štučnaje zaciahvańnie terminaŭ praviadzieńnia takoha pasiadžeńnia tolki paradžaje atmaśfieru ŭzajemnaha niedavieru i tym samym źmianšaje aŭtarytet SND», — zajaŭlaje pastajannaje pradstaŭnictva Ukrainy pry kaardynacyjnych instytutach SND.
Nahadajem, praviadzieńnie niečarhovaha pasiadžeńnia SMZS SND Ukraina inicyjavała ŭ suviazi z padziejami ŭ Krymie. Pieršapačatkova jaho prapanoŭvałasia pravieści ŭ Kijevie 7 sakavika, ale šerah krain SND, u tym liku Biełaruś, vykazalisia za pieranos sustrečy na bolš poźni termin. U pryvatnaści, jak zajaviŭ u kancy minułaha tydnia pres-sakratar biełaruskaha MZS Dźmitryj Mirončyk, pryncypova Minsk nie piarečyć suprać praviadzieńnia niečarhovaha pasiadžeńnia SMZS, adnak ličyć nieabchodnym pravieści papiarednija kansultacyi dla ŭzhadnieńnia prajektaŭ dakumientaŭ, što vynosiacca na abmierkavańnie ministraŭ. Z ulikam takich mierkavańniaŭ ukrainski bok prapanavaŭ pravieści niečarhovaje pasiadžeńnie SMZS u Kijevie 12 sakavika.
Čarhovaje pasiadžeńnie Savieta ministraŭ zamiežnych spraŭ krain Sadružnaści zapłanavana na 4 krasavika i pavinna prajści ŭ Maskvie.
