Kaardynatar kampanii «Budźma biełarusami!» Nina Šydłoŭskaja na startavaj pres-kanfierencyi adznačyła, što AD.NAK! dla arhanizataraŭ budzie «supieradkaznym». I nie tolki tamu, što ŭ pracu ŭciahnuta jašče bolš prafiesijanałaŭ u svajoj spravie.
Sioletni fiestyval jubilejny, i jon budzie peŭnym padsumavańniem tendencyj adnosna ŭžyvańnia biełaruskaj movy ŭ śfiery biźniesu i markietynhu.
Taksama pašyranaja prahrama fiestyvalu, śpis naminacyjaŭ, rychtujecca admysłovaja adukacyjnaja prahrama. «Viadoma, rekłama robicca dziela taho, kab prynosić prybytak toj ci inšaj kampanii. Ale kali my zakładali hety fiestyval, my zychodzili z taho, što jana jašče i mocny srodak upłyvu na śviadomaść ludziej. Tamu tak važna danieści da pradstaŭnikoŭ biźniesu, što svajo, biełaruskaje — heta nie tolki cikava i karysna, ale i vyhadna. Sioleta my ŭzmacniajem trend pa spałučeńni hłabalnaha i łakalnaha, jaki atrymaŭ nazvu Glocal. I vielmi radasna asensoŭvać, što ŭsie hetyja piać hadoŭ my znachodzilisia, pa sutnaści, u hetym trendzie i ŭciahvali pradstaŭnikoŭ prafiesijnaj supolnaści ŭ pracesy vykarystańnia nacyjanalnaj admietnaści ŭ rekłamie i biźniesie», — zaŭvažyła Nina.
Kiraŭnik prajekta Marketing.by i suarhanizatar AD.NAK! Siarhiej Skarachod paradavaŭ svajoj vydatnaj biełaruskaj movaj (padčas pieršaha festu jana davałasia jamu ciažkavata)
i ŭ svajoj pramovie źviarnuŭ uvahu na novaŭviadzieńni. U pryvatnaści, na hetym fiestyvali budzie dźvie novyja naminacyi — «Markietynhavaja efiektyŭnaść» i «Inavacyjnyja rašeńni ŭ markytynhu i rekłamie». Akramia taho, projduć piać konkursaŭ u farmacie dvuchdzionnych vorkšopaŭ, u miežach jakich udzielniki zmohuć stvaryć aryhinalny pradukt na zadadzienuju temu. Naprykład, biełarusizavać adzin ź biełaruskich brendaŭ, jakija pakul nie ŭ abvieščanym trendzie («Brend-pierazahruzka»). Ci stvaryć sacyjalnuju rekłamu. Pracu pieramožcy ŭ konkursie «AD.NAK! suprać Drugs» pa papiaredniaj damoŭlenaści hatovaje ŭchvalić Ministerstva handlu Biełarusi dla raźmiaščeńnia na bihbordach i płakatach. Jašče adzin konkurs zaviecca «Ździvi turysta» i ładzicca razam z kampanijaj — vytvorcam suvieniraŭ Universal Press. «Suvieniry z nacyjanalnym kałarytam vyrablajuć u asnoŭnym ramieśniki, a my chočam, kab jany vyrablalisia pramysłova, tamu i šukajem aŭtaraŭ, jakija mohuć prapanavać sučasny dyzajn-prajekt dla naniasieńnia jaho na majki, kubki, torby dy inšuju suvienirnuju pradukcyju», — kaža kiraŭnik Universal Press Alaksandr Dzieškaviec. Taksama budzie konkurs «Infahrafuj historyju AD.NAK!», dzie možna papraktykavacca pad kiraŭnictvam daśviedčanych admysłoŭcaŭ.
Načalnik adździeła kiravańnia brendam kampanii velcom Źmicier Kurłovič taksama vydatna razmaŭlaje pa-biełarusku i razumieje, što rekłama na svajoj movie prynosić plon.
«Navat pa prahladach našych imidžavych rekłamnych rolikaŭ na Youtube vidavočna, što bolš cikavaści vyklikajuć mienavita biełaruskamoŭnyja pracy», —
kaža Źmicier. Ciapier velcom biarecca za padtrymku idei biełarusizacyi ŭsurjoz. Kampanija vystupaje hienieralnym partnioram AD.NAK!, rychtujecca abviaścić praz tydzień novy prajekt, pryśviečany biełaruskaj movie, i navat pastupova pierakładaje svaje promamateryjały na biełaruskuju.
Pavodle nazirańniaŭ kiraŭnika Ahienctva vizualnych kamunikacyj AVC Volhi Alejnik, pradstaŭniki biźniesu ŭ cełym śviecie vydatna razumiejuć toje, što ŭmieńnie vykarystoŭvać kulturnyja kody, jakija mohuć siadzieć u čałavieku vielmi hłyboka, prynosić pośpiech. «Na «Kanskich lvach» u bolš čym pałovie rolikaŭ prahramy stvaralniki pravilna i tonka vykarystoŭvajuć svaje kulturnyja zdabytki. Asabliva japoncy», — kaža Volha i zaŭvažaje, što zamiežnyja kampanii pry adkryćci svaich pradstaŭnictvaŭ u peŭnym rehijonie najpierš daskanała vyvučajuć jaho kulturny bekhraŭnd. I Biełaruś tut nie musić być vyklučeńniem jak dla pryjezdžych, tak i dla miascovych biźniesoŭcaŭ.
Dla tych ža, chto pakul nie da kanca razumieje asablivaści biełaruskaha kulturnickaha kodu, pryznačanaja tradycyjnaja naminacyja AD.NAK!, peŭna, samaja lubimaja ŭ žurnalistaŭ — «Kaša suvoraŭskaja». Heta antypremija, jakaja prysudžajecca samym niedalnabačnym rekłamistam. «Ale nie z tym, kab tycnuć nosam, a kab pakazać, što budavać rekłamu i kamunikacyju varta na hlebie pavahi na nacyjanalnych kulturnych i histaryčnych kaštoŭnaściaŭ», — zaŭvažaje Nina Šydłoŭskaja.
Sajt Piataha fiestyvalu AD.NAK! pačnie pracavać z 30 krasavika. Z hetaha času i pačniecca pryjom zajavaŭ. Dedłajn — 9 červienia.
A finalnaja častka z uručeńniem pryzoŭ i bahataj adukacyjnaj prahramaj zapłanavanaja na 27 červienia.
