Ministerstva adukacyi pryniało pastanovu, jakaja vyznačaje terminy praviadzieńnia ŭstupnaj kampanii dla atrymańnia vyšejšaj adukacyi I stupieni ŭ hetym hodzie, paviedamiła pres-sakratar Ministerstva adukacyi Julija Vanina.
Pryjom dakumientaŭ na biudžetnyja miescy ŭ vočnaj (dzionnaj, viačerniaj) abo zavočnaj, u tym liku dystancyjnaj formach, u dziaržaŭnych VNU budzie pravodzicca z 8 pa 12 lipienia. Pry hetym pa zavočnaj formie ŭ VNU sielskahaspadarčaha profilu svaje terminy — z 1 pa 30 listapada.
Terminy ŭstanoŭleny i dla tych, chto choča atrymać vyšejšuju adukacyju za košt srodkaŭ jurydyčnych asob, indyvidualnych pradprymalnikaŭ, fizičnych asob abo ŭłasnych srodkaŭ. U vočnaj (dzionnaj) abo zavočnaj formach ŭ Akademii MUS, Mahiloŭskim vyšejšym kaledžy MUS, Kamandna-inžyniernym instytucie MNS, Homielskim inžyniernym instytucie MNS, Instytucie pamiežnaj słužby — z 8 pa 28 lipienia. Hetyja ž terminy vyznačany dla Biełaruskaj dziaržaŭnaj akademii mastactvaŭ, Biełaruskaj dziaržaŭnaj akademii muzyki i Biełaruskaha dziaržaŭnaha univiersiteta kultury i mastactvaŭ. Dla inšych dziaržaŭnych i pryvatnych VNU — heta z 8 pa 31 lipienia (dla zavočnaj formy sielhasprofilu — z 1 pa 30 listapada).
Ustupnyja vyprabavańni ŭ siłavych VNU (Akademii MUS, Mahiloŭskim vyšejšym kaledžy MUS, Kamandna-inžyniernym instytucie MNS, Homielskim inžyniernym instytucie MNS, Instytucie pamiežnaj słužby) projduć z 13 pa 16 lipienia, a takich VNU, jak Biełaruskaja dziaržaŭnaja akademija mastactvaŭ, Biełaruskaja dziaržaŭnaja akademija muzyki i Biełaruski dziaržaŭny univiersitet kultury i mastactvaŭ, — z 13 pa 22 lipienia. Dla ŭsich astatnich — z 13 pa 18 lipienia (zavočnaja forma sielhasprofilu — z 1 pa 20 śniežnia).
Zaličeńnie abituryjentaŭ na biudžetnyja miescy ŭ VNU MUS i MNS, a taksama ŭ Instytucie pahransłužby i Vajennaj akademii projdzie pa 20 lipienia, u dziaržaŭnych akademijach mastactvaŭ, muzyki i univiersitecie kultury — pa 26 lipienia, a ŭ inšych VNU — pa 22 lipienia (zavočnaja forma sielhasprofilu — pa 25 śniežnia). Što tyčycca miescaŭ dla atrymańnia adukacyi na płatnaj asnovie, to ŭ VNU siłavoha błoka — pa 29 lipienia, u VNU śfiery kultury — pa 29 lipienia, va ŭsich astatnich — pa 2 žniŭnia (zavočny sielhasprofilu — pa 25 śniežnia).
