Abłsaviet vykazaŭ svajo krajniaje abureńnie niežadańniem centralnaj ułady ŭ Kijevie pahadzicca z «zakonnymi» patrabavańniami žycharoŭ Danbasa.
Pra heta havorycca ŭ zajavie, pryniataj na čarhovaj siesii abłsavieta 24 krasavika.
«U situacyi, jakaja skłałasia, my zajaŭlajem ab padtrymcy dziejańniaŭ narodnych deputataŭ Partyi rehijonaŭ i Kamunistyčnaj partyi ŭ parłamiencie, jakija adstojvajuć intaresy uschodu Ukrainy, adstojvajuć prava našych vybarščykaŭ žyć hodna, pa ŭłasnym vybary, a nie pa ŭkazcy z Kijeva», — skazana ŭ zvarocie.
Akramia hetaha, deputaty abłsavieta padtrymali rašeńni Nadzvyčajnaha źjezdu deputataŭ usich uzroŭniaŭ Danieckaj vobłaści, jaki zaklikaŭ centralnuju ŭładu nieadkładna pierajści da dziejańniaŭ, nakiravanych na deeskałacyju kanfliktu na Uschodzie Ukrainy.
«My padtrymlivajem patrabavańni ab nieadkładnym i biezumoŭnym pryniaćci zakanadaŭčaha rašeńnia ab amnistyi hramadzian, jakija pryniali ŭdzieł u pratestnych akcyjach na paŭdniovym uschodzie krainy. My vystupajem za hłybokuju decentralizacyju ŭłady — pašyreńnie paŭnamoctvaŭ abłasnych, rajonnych i sielskich savietaŭ, pramyja ŭsienarodnyja vybary staršyniaŭ abłasnych i rajonnych savietaŭ; farmiravańnie vykankamaŭ abłasnych i rajonnych savietaŭ; rospusk abłasnych i rajonnych dziaržaŭnych administracyj», — havorycca ŭ zajavie.
Taksama deputaty vystupajuć za biudžetnuju aŭtanomiju rehijonaŭ, jakaja, na ich dumku budzie stymułam dla raźvićcia i praviadzieńnia efiektyŭnaj ekanamičnaj palityki na miescach. Taksama jany vystupili za pieraraźmierkavańnie padatkaŭ pamiž rehijonami i centram, a taksama za pradastaŭleńnie ruskaj movie statusu druhoj dziaržaŭnaj.
Implemientacyju svaich patrabavańniaŭ jany bačać praź nieadkładnaje ŭniasieńnie źmianieńniaŭ u Kanstytucyju Ukrainy i zakony šlacham refierendumu i hałasavańnia ŭ parłamiencie.
