Biznesmien Alaksandr Mašenski maje namier raźvivać alternatyŭny kirunak svajho biznesu — turystyčny servis. Praŭda, pakul u Biełarusi heta rabić składana.
Uładalnik hrupy kampanij «Santa Impeks Brest», «Santa-Bremar» i «Savuškin pradukt», maje namier praciahvać pracu ŭ śfiery turystyčnych pasłuh. Heta kirunak staŭ trecim u jaho biznesie paśla vytvorčaści charčovaj pradukcyi i praduktovaha retejłu.
Z pačatku hetaha hoda pad Brestam na bierazie znakamitaha voziera Biełaje zapracavaŭ turystyčny kompleks «Šale GreenWood». Jon uklučaje restaran italjanskaj kuchni, haścinicu, łaźniu. Da pačatku kupalnaha siezonu na bierazie zapracuje akulturany plaž, z časam servis papoŭnicca SPA-pasłuhami.
Adznačym, što ŭ vakolicach voziera raźmiaščajecca mnostva abjektaŭ rekreacyjnaha pryznačeńnia typu baz adpačynku, ale «Šale GreenWood» staŭ pieršym abjektam kłasa luks.
Na naradzie pa raźvićci pradprymalnictva, jakaja adbyłasia ŭ Breście pad kiraŭnictvam Piatra Prakapoviča, Alaksandr Mašenski prapanavaŭ inšym pradprymalnikam brać ź jaho prykład i raźvivać servis turpasłuh, a dziaržavie — stvaryć umovy dla takoha raźvićcia.
«Heta kirunak, razam ź IT-industryjaj, atrymaŭ novy šturšok raźvićcia ŭ Minsku, u tym liku dziakujučy padrychtoŭcy da ČS pa chakiei, — adznačyŭ biznesmien. — Pry pravilnym padychodzie dziaržavy turystyčny servis moža stać surjoznaj industryjaj u rehijonach i vialikim pracadaŭcam i padatkapłacielščykam».
Biełaruś stanovicca ŭsio bolš papularnaj siarod rasijskich turystaŭ: heta i miedycynski, hulniavy, paznavalny i, mahčyma, u pierśpiektyvie, šopinhavy turyzm. «Siońnia Biełaruś maje takoje ž značeńnie ŭ adnosinach da Rasiei, jak Prybałtyka kaliści — u dačynieńni da Savieckaha Sajuza. Intehracyja ŭ ramkach JEEK budzie hetamu spryjać», — ličyć Alaksandr Mašenski.
Što ž tyčycca Bresckaha rehijonu, jon, na mierkavańnie biznesmiena, pierśpiektyŭny dla raźvićcia turyzmu dziakujučy svajmu pamiežnamu stanovišču i dobraj ekałohii. Bolš za toje, tut raźmieščanyja turystyčnyja słavutaści.
Bresckaja krepaść daŭno źjaŭlajecca abjektam histaryčnaha turyzmu i miescam pałomnictva dla rasiejcaŭ, jakija cikaviacca fartyfikacyi. Akramia krepaści, haściej Brestčyny pryciahvajuć Biełaviežskaja pušča i bijaśfierny zapaviednik «Paleśsie».
«Santa Impeks Brest» vyrašyła pajści pa nieprakładzienaj ściežcy i pieršaj uziacca za stvareńnie sučasnaha turystyčnaha kompleksu. «My pracujem u hetym rehijonie, i kamu jak nie nam jaho raźvivać», — skazaŭ biznesmien.
Adnak sprava akazałasia niaprostaj. U addaleńni ad horada ŭ sasnovym lesie adsutničaje ŭsiakaja infrastruktura. Kampanii daviałosia samastojna prakładvać 5-kiłamietrovuju halinu hazapravoda, abnaŭlać liniju elektrapieradačy i pravodzić vadu.
Infrastrukturnyja vydatki mohuć adbić žadańnie ŭ pradprymalnikaŭ paŭtaryć podźvih bresckaj kampanii. Potym Alaksandr Mašenski prapanoŭvaje dziaržavie paŭdzielničać u ahulnaj spravie i pakłapacicca pra stvareńnie infrasturkury ŭ peŭnych dla raźvićcia turyzmu miescach.
Pa-druhoje, biznesmien prapanavaŭ uładam źviarnucca da vopytu takich jeŭrapiejskich krain, jak Andora, Lichtenštejn. U ich jość peŭnyja turystyčnyja struktury, jakija vyzvalajucca ad niekatorych katehoryj padatkaŭ.
Naprykład, možna vyznačyć, što niejkaja zona ŭ Bresckim rajonie, pa pamierach anałahičnaja svabodnaj ekanamičnaj zonie, nasyčajecca abjektami servisu i turyzmu. I ŭsie subjekty haspadarańnia, jakija pracujuć na hetaj terytoryi, vyzvalajucca ad vypłaty PDV. Tady b tut pradavaŭsia ałkahol i tavary biełaruskaj pramysłovaści biez PDV, što pryciahvała b rasiejcaŭ jeździć siudy dla sumiaščeńnia adpačynku z šopinham.
