U Instytucie žurnalistyki BDU raźmierkavańnie. Na ŭvachodzie adrazu sustrakaju dziaŭčynu ŭ ślazach — chacieła pieraraźmierkavacca z Barysava ŭ Minsk.
«Ja skončyła ŭ lutym. Mianie raźmierkavali ŭ Barysaŭ. Pajechała tudy z narmalnym nastrojem. Tam paprasili pracavać pa vychodnych, zastavacca paśla pracy. Ja skazała tam, što źbirajusia zamuž. Jany paskardzilisia va ŭnivier. Ja vyjšła zamuž, adniesła dakumienty va ŭniviersitet i siońnia pryjšła na raźmierkavańnie. Zachodziła pieršaj, bo nibyta była niejkaja zajaŭka ź Minska, a ŭ mianie muž minčanin. Ale jana akazałasia niekarektna aformlenaja. U vyniku mnie ciapier ci to nazad u Barysaŭ jechać, ci to vypłačvać hrošy», — niepakoicca Elina.
Jaje siabroŭcy Aksanie, taksama zamužniaj, pašancavała bolej. Spačatku raźmierkavali, a paśla ŭsio ž dali svabodny dypłom. Budučym vypusknicam jana raić ažanicca.
Alaksandru raźmiarkoŭvajuć u Naroŭlu. Choča pieraraźmiarkoŭvacca.
«U raźmierkavalnych listach abiacali staŭku ŭ 1,1 miljona. Svajho nakiravańnia ja nie prynoślia. Źbirajusia pieraraźmiarkoŭvacca, kali niešta znajdu. Pryvatnyja prapanovy jość, ale treba ź dziaržaŭnaj, bo ŭ pryvatnyja nie chočuć adpraŭlać», — raskazvaje Alaksandra.
Ź jaje patoka 5 dziaŭčat užo ažanilisia. Ale nie ŭsich heta ŭratavała ad raźmierkavańnia, bo na ich byli metavyja zapyty.
Zajaŭki na maładych śpiecyjalistaŭ padali «Savieckaje Paleśsie» z Hancavič, «Drahičynski vieśnik», «Ašmianski vieśnik». Staŭki krychu bolšyja za miljon. Bolš za dva miljony na staŭku hatovaja płacić tolki hazieta «Praca» ŭ Zelvie, i ŭ Karmie na radyjo. Ź Minsku Jeŭraradyjo nie znachodzić nivodnaj zajaŭki z tych, što visiać u faje ŭniviersiteta.
Na sajt haziety «Vieśnik Čerykaŭščyny» šukajuć vieb-redaktara na staŭku ŭ 1,1 miljon. Praz pašukaviki adrazu sajt nie znachodzim, ale ŭ redakcyi ŭpeŭnivajuć, što jon jość.
«Zaraz pahladzim, jak jon nazyvajecca… chvilinačku», — pryhadvajuć svaju staronku u vydańni. I dadajuć: pa raźmierkavańni ŭ ich pracuje… hałoŭny redaktar!
«U zvyčajnaha karespandenta ŭ nas akład 1 miljon 106 tysiač. Nu, i plus premii, hanarary, bolš za dva budzie vychodzić», — abiacajuć na Čerykaŭščynie.
Hazieta «Narodny hołas» na Homielščynie čakaje fotakarespandenta. Śpiecyjalist pastupaŭ pa metavym zapycie, tamu pryjedzie dakładna, zapeŭnivajuć u redakcyi.
«Za piać hadoŭ upieršyniu zajaŭku dasyłajem. Dziaŭčyna vučyłasia pa metavym nakiravańni», - akład tut abiacajuć u 1,2 miljony.
Letaś pa raźmierkavańni pajechali pracavać 18 tysiač maładych śpiecyjalistaŭ z dypłomami ŭniviersitetaŭ. Heta pry 20-ci tysiač raźmierkavanych.
