Prezident Bałharyi Rosien Pleŭnialijeŭ ličyć, što, adnaŭlajučy raniejšuju śfieru ŭpłyvu, Kreml nie abmiažujecca terytoryjaj byłoha SSSR — pad pahrozaj i krainy paŭdniova-ŭschodniaj Jeŭropy.
Pra heta paviedamlaje Deutsche Welle.
«Siońnia my bačym ahresiŭnuju i nacyjanalistyčnuju Rasiju, jakaja pravodzić palityku adnaŭleńnia svajho ŭpłyvu», — zajaviŭ jon na pres-kanfierencyi ŭ Štutharcie, dzie vystupaŭ z pramovaj ab 7-hadovym pieryjadzie znachodžańnia Bałharyi ŭ ES. Pryčym terytoryjaj byłoha SSSR Kreml nie abmiažujecca, aścierahajecca kiraŭnik bałharskaj dziaržavy.
Krainy paŭdniova-ŭschodniaj Jeŭropy jon razhladaje jak «samaje słaboje źviano ŭ Jeŭrapiejskim Sajuzie», jakoje moža być destabilizavana znutry pry dapamozie «nacyjanalistaŭ, aliharchaŭ, karupcyi, prapahandy i enierhietyčnaj zaležnaści».
Kreml, pa słovach Pleŭnielijeva, imkniecca pryciahnuć na svoj bok «jeŭrapiejskich papulistaŭ, jeŭraskieptykaŭ, pravych ekstremistaŭ, nacyjanalistaŭ i raznastajnych jeŭranienaviśnikaŭ», jakija zacikaŭlenyja ŭ asłableńni ES, i tamu hatovyja padtrymać Pucina.
Kreml, adznačyŭ jon, «vykarystoŭvaje aliharchaŭ i ich ŚMI, a kanały ŭpłyvu zachavalisia z kamunistyčnych časoŭ», jak i suviazi pamiž śpiecsłužbami krain Varšaŭskaha dahavora.
Što ž tyčycca Ukrainy, to jaje «narod maje svaju dziaržavu i maje prava samastojna vyznačać svoj los». Rašeńnie ŭkrainskaj prablemy jon bačyć u praviadzieńni svabodnych prezidenckich vybaraŭ.
Kiraŭnik bałharskaj dziaržavy padzialiŭ historyju sučasnaj Jeŭropy na «da i paśla Kryma».
Bałharyja hatovaja padtrymać tak zvanuju «treciuju prystupku» sankcyj u dačynieńni da Rasii, niahledziačy na toje, što bolš zaležyć ad pastavak rasijskich enierhanośbitaŭ. Jeŭrasajuz pavinien być mocnym i dziejničać rašuča ŭ imia zachavańnia svaich kaštoŭnaściaŭ, ličyć prezident. «Bałharski ŭrad adnaznačna i paśladoŭna padtrymlivaje pryniatyja ŭ Brusieli rašeńni, jakija tyčacca sankcyj suprać Rasii. I kali budzie nieabchodnaja ich «treciaja stupień», značyć, jana pavinna być», — skazaŭ jon.
Pry hetym Rosien Pleŭnialijeŭ adnaznačna vykazaŭsia za dalejšaje pašyreńnie NATA ŭ adkaz na ahresiŭny kurs Maskvy.
«Ja liču, — zajaviŭ jon, adkazvajučy na pytańnie DW, — što Paŭnočnaatłantyčny aljans pa hieapalityčnych i stratehičnych mierkavańniach pavinien u bližejšy čas, naprykład, užo na samicie ŭ Anhlii, u vieraśni, pryniać u svaje šerahi Čarnahoryju, a taksama paskoryć praces intehracyi ŭ dačynieńni da ŭsich inšych bałkanskich krain».