U krasaviku hetaha hoda ŭ Biełarusi było zarehistravana 1.814 paciarpiełych ad ukusaŭ iksodavych klaščoŭ, u tym liku 726 dziaciej, što ŭ piać razoŭ pieravyšaje pakazčyki krasavika minułaha hoda.
Jak paviedamlaje Respublikanski centr hihijeny, epidemijałohii i hramadskaha zdaroŭja, rezkamu rostu kolkaści paciarpiełych sadziejničała pavieličeńnie ŭ 2,2 razu kolkaści klaščoŭ u pryrodnych bijatopach u paraŭnańni z papiarednim hodam.
Pavodle słoŭ śpiecyjalistaŭ, siezon aktyŭnaści klaščoŭ sioleta pačaŭsia niezvyčajna rana, pieršyja ŭkusy zarehistravany ŭ treciaj dekadzie lutaha.
«Pastupovaje adnaŭleńnie ciopłaha nadvorja paśla časovaha pachaładańnia budzie sadziejničać pavyšeńniu ŭ mai aktyŭnaści i kolkaści klaščoŭ. Siezonny pik ich kolkaści prahnazujecca da kanca maja — pačatku červienia», — adznačajuć miedyki.
Śpiecyjalisty papiaredžvajuć, što ŭ pieryjad aktyŭnaści iksodavych klaščoŭ ź viasny da poźniaj vosieni isnuje niebiaśpieka zaražeńnia takimi infiekcyjami, jak kleščavy encefalit i chvaroba Łajma.
Kab paźbiehnuć zaražeńnia, miedyki rekamiendujuć
maksimalna zakryvać adkrytyja ŭčastki cieła pry naviedvańni lesaparkavych zon, prymianiać repielenty i akarycydnyja srodki, kožnyja adnu-dźvie hadziny pravodzić sama- i ŭzajemaahlady adzieńnia i skurnych pokryvaŭ, a taksama ŭžyvać u ježu tolki hatavanaje kazinaje małako.
U vypadku prysmoktvańnia klašča rekamiendujecca vydalić jaho, apracavać ranku jodam i źviarnucca da ŭčastkovaha terapieŭta abo piedyjatra pa prafiłaktyčnaje lačeńnie.
