Halereja Alaksieja Kuźmiča adkryjecca 1 červienia na radzimie viadomaha biełaruskaha mastaka ŭ vioscy Machro Ivanaŭskaha rajona, paviedamiła karespandentu BiełTA zahadčyca siektaram ideałahičnaj raboty adździeła ideałahičnaj raboty, kultury i pa spravach moładzi Ivanaŭskaha rajvykankama Valancina Pucykovič.
Mastackaja halereja budzie stvorana na bazie Doma kultury vioski Machro na płoščy 120 kv.m. Zaraz tam iduć budaŭničyja raboty. Na hetyja mety z abłasnoha biudžetu vydzielena Br250 młn. Akramia taho, Br20 młn pastupiła ź miascovaha fondu subotnika.
Prapanova ab stvareńnie halerei pastupiła ad siamji mastaka, jakaja hatovaja pieradać kala 150 pałotnaŭ aŭtara. Akramia karcin u ekspazicyi buduć pakazanyja asabistyja rečy Alaksieja Kuźmiča. U asobnaj zale buduć ekspanavacca raboty miascovych mastakoŭ, jakich u Ivanaŭski rajonie niamała.
«Pry žyćci Alaksiej Kuźmič pastajanna pryjazdžaŭ na svaju małuju radzimu, ładziŭ vystavy, pravodziŭ tvorčyja sustrečy. Adkryćcio halerei zapłanavana na 1 červienia nie vypadkova. Hetu padzieju my chočam prymierkavać da dnia naradžeńnia majstra i Mižnarodnaha dnia abarony dziaciej, što nieparyŭna źviazana ź jaho tvorčaściu. Spadziajemsia, atrymajecca cikavy kulturny abjekt, jaki ŭvojdzie ŭ aficyjnyja turystyčnyja maršruty našaha kraju», — adznačyła Valancina Pucykovič.
Centralnaj temaj tvorčaści Alaksieja Kuźmiča (1945—2013) staŭ vobraz Madonny. Kala 1 tys. karcin, na jakich namalavana žančyna, — oda pryhožaj pałovie čałaviectva. Mastak taksama viadomy jak aŭtar bolš za 50 psichałahičnych partretaŭ viadomych dziejačaŭ kultury Biełarusi. Alaksieju Kuźmiču paziravali Stefanija Staniuta, Maryja Zacharevič, Barys Łucenka, Michaił Ptašuk, Uładzimir Haściuchin, Mikałaj Jaromienka i inšyja znakamitaści.
