Karespandent haziety «Saviecki sport» Vital Słavin padzialiŭsia mierkavańniem ab arhanizacyi fan-zon na čempijanacie śvietu ŭ Minsku.
«Biełarusy — dobry, sumlenny, haścinny narod. Čempijanat śvietu — pieršaje pa-sapraŭdnamu prestyžnaje, raskručanaje, z hłybokimi tradycyjami płanietarnaje hała-pradstaŭleńnie ŭ hetaj krainie. Pamiataju, jak biełaruskija žurnalisty na ČS-2009 u Biernie niervavalisia pierad vybarami stalicy ČS-2014, i jak jany radavalisia, kali vyjhraŭ Minsk: «Narešcie my pakažam našu lubimuju Biełaruś śvietu!» I, sapraŭdy, arhanizatary litaralna vyściłajucca pierad haściami. Tym bolš stalicy jość, čym hanarycca i navat vychvalacca. Z kim ciapier nie pahavaru, usio ŭ zachapleńni — čyścinia, pryhožyja budynki, masa parkaŭ, šyrokija praśpiekty, idealny hramadski transpart…
Ale, prama skažu, ciažka nazirać za ahidnaj, niastrymnaj i absalutna adkrytaj tatalnaj pjankaj na vulicach Minska. Asabliva ŭ miastečku zaŭziatara, u samym sercy biełaruskaj stalicy, la staroha Pałaca sportu. Naviedaŭ bolš za 20 čempijanataŭ śvietu, ale takoj vakchanalii nie bačyŭ nikoli! U hetaj fan-zonie nie tolki ŭsiu noč piva bje fantanam, tut biez abmiežavańnia raźlivajuć lubyja mocnyja napoi. Mnie strašna hladzieć na natoŭpy pjanaj moładzi, jakaja pje harełku z harła navat u aŭtobusach. U hetym tak zvanym miastečku zaŭziatara rehularna ź luboj pryčyny ŭspychvajuć bojki. Bačyŭ uviečary paśla matču Biełaruś — Rasija na svaje vočy, jak chłopiec paśla chuka ŭ łob lacieŭ praz stoł uniz hałavoj.
Usio heta prosta žudasna i ahidna. Ja razumieju, arhanizatary ČS-2014 chacieli zrabić, jak lepš. Ułahodzić pryjezdžych zaŭziataraŭ — nakarmić ich miascovymi smačnaściami da advału, napaić ad šyrokaj biełaruskaj dušy zubroŭkami i biełaviežskimi z žuravinami. Ale nielha ž davodzić da absurdu! Suśvietnaja arhanizacyja achovy zdaroŭja, darečy, 12 maja nazvała Biełaruś samoj ałkahalizavanaj krainaj śvietu», — napisaŭ Słavin.
